1624/2022-2023
Kolasib dated 16th August 2022: Vawiin chawhnu khan DC Conference Hall, Kolasibah Pu John LT Sanga, District Election Officer hovin Bairabi North, Kolasib Venglai leh Zanlawna Village Council By-Election neih tur a Sawrkar hnathawk mawhphurna hrang hrang changtute, Political party aiawhte leh tlawmngai pawl hruaitute chuan thutkhawmna an nei a. Heng khaw pathuma Village Council By-Election hi State Election Commission thuchhuak angin ni 6, September 2022 hian neih tur a nih thu sawi a ni.

Vawiin thutkhawm a tarlan danin Village Council By-Election neih tur a tihna lehkha hi August ni 11, 2022 khan tihchhuah a ni a. Ni 18, August tlai dar 3:00 thleng Candidate-te hming thehluh hun hawn tur niin ni 19, August-ah endik a ni ang. Candidate zingah in hnukdawk duh an awm a nih chuan ni 22, August 2022 chawhnu dar 3:00 thleng hun hawn a ni ang a, ni 6 September, 2022 zing dar 7:00 atanga tlai dar 5:00 thleng inthlanna hi kalpui a ni ang. Hemi ni vek hian inthlan zawh ah vote tla te chhiar nghal a ni dawn a, heng khaw pathuma inthlanna kaihhnawih tul zawng zawngte chu ni 9, September 2022 hian zawh fel vek tur a ruahman a ni.

Hun kaihruaitu Pu John LT Sanga, DEO leh Deputy Commissioner ni bawk chuan inthlanna thianghlim leh felfai kalpui a nih theih nan heng khaw pathuma sawrkar atanga inthlanna buaipui tur a ruatte, Political party aiawhte leh NGO hruaituten thawhhona tha tak an neih a pawimawh thu a sawi a. A tul anga Training-te pek an nih angin inthlan kaihnawih a State Election Commission ina inkaihhruaina a siamte chu zawm zel turin leh midangte pawh hemi kawnga kaihhruaitu ni turin a chah a ni.

Heng khaw pathuma Voter awm zat ennawnna kalpui hnuhnun berin a tarlang dan chuan Bairabi North-ah vote nei mi 2,514 an awm a heng zing a 1,220 te hi mipa niin 1,294 chu hmeichhia an ni a. Kolasib Venglaiah vote nei mi 2,502 an awm a. Mipa 1,136 leh hmeichhia 1,366 an awm. Zanlawnah hian vote nei mi 820 an awm a, mipa 377 leh hmeichhia 443 an awm a ni. Rualban lo voter 20 awm anga chhinchhiah a ni bawk.