1625/2022-2023
Champhai, the 16th August, 2022: Vawiin chhun dar 12:00 khan Champhai New Market (CHANEM) enkawl chungchanga mawhphurtu CHANEM Management Authority chu an Chairman Pu James Lalrinchhana, District Bawrhsap hovin I&PR Conference Hall, CHANEM-ah an thukhawm.

CHANEM Management Authority Chairman Pu James Lalrinchhana chuan Champhai khawpui hmel lanna langsar tak, CHANEM building chu Champhai tana hmunhma tangkai leh pawimawh tak a nih thu sawiin, rotling leh tangkai taka hman a nih theih nan bungraw tul dah leh faina vawnnun zel a pawimawh thu a sawi a. A luahtute leh eizawn nana hmangte tana him leh mamawh angte chhawpchhuah a nih theih nan tanho zel a pawimawh a ni, a ti a. Hmasawnna rahbi thar chuangkai turin a tahtawla inzirtirna nena tangkawp chunga hmalak a tul thin thu sawiin, hman khat daih polythene/plastic, Single Use Plastic (SUP) hmang lo tura hmalak mek zelah pawh inzirtirna nena bultana, hmang tlem hret hret chung zela insiamrem a ngaih thu a sawi bawk.

CHANEM Management Authority Member Secretary, Pi R.Lalnunkimi, DUDO Champhai hnen atangin meeting agenda tlangpui ngaihthlak niin, thutkhawm hmasa thurel bawhzui a nih dante leh dilna lutte ngaihthlak a ni bawk.

He hunah hian Indus Tower Limited atanga CHANEM building chunga mobile network tihchak nana High Power Small Cell (HPSC) internet tower bun tura dilna lut chungchang ngaihtuahho a ni a, a remchan lohna hrang hrangte sawiho a nih hnuah tower bun chu phal loh mai nise tih a ni a. Rukruk leh dan lova thiltih ven nan CHANEM building-a CCTV vuah a nih theih nana hmunhma leh tul dangte buaipui tura din Sub-Committee report ngaihthlak a ni a, CCTV vuah tura tul angte buaipuia hma la chhunzawm tura ruat an ni a. Venhim hna thawk turin security guard awmsa 2 te belhchhah turin 1 dang lak belh leh ni se tih a ni bawk.

Thukhawm chuan CHANEM Complex-a mei eng lian High Mast dah tura dilna lut chu CHANEM Management Authority-in tul a tih huna siam danglam theih turin a rem ti a. CHANEM building hungna siam that leh gate siam tulte pawh remtih a ni bawk a. Heng bakah hian August ni 1, 2022 atanga hman khat daih polythene awm lohna Single Use Plastic Free Complex-a puan tawh CHANEM Complex-a hmalak dante thlirho a ni a, Complex chhunga lirthei dah thin khuahkhirh leh hmalak tulte sawiho a ni bawk.

Champhai khawpui hmel lanna pawimawh tak pakhat CHANEM Building hi CHANEM Management Authority enkawlna hnuaiah awmin Registrar of Firms & Societies, Government of Mizoram hnuaia register a ni a, annual report, activity report leh balance sheet report mumal tak siama kalpui a ni.

CHANEM Management Authority hmalaknain CHANEM Complex-ah kum 2021 October thla atang khan Maxi Cab Counter dah a ni a, CHANEM Building-a dawr luahtuten CHANEM Dawrkai Association November ni 2, 2021 khan an din bawk a ni. Tun dinhmunah hian Private Firm, Company leh pawl dangte bakah Sorkar Department UD&PA, I&PR, Health Department Medical Store, FCS&CA, KVI, Fast Track Special Court, Holiday Court leh Transport Department-te chu CHANEM Building-ah hian an awm mek a. CHANEM room luahman atangin a enkawl leh cheithat, thawktu hlawh leh security ruahman a ni.