891/2024-2025

Champhai, 21st June 2024: Vawiin khan Champhai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Champhai District Bawrhsap Pu James Lalrinchhana hovin Champhai DC Conference Hall-ah an ṭhu khawm a. Financial Inclusion chungchang leh ramdang nena insumdawn tawnnaah India pawisa a tam thei ang ber hman a nih theih dan tur te an sawiho.

Thutkhawm kaihruaitu Pu James Lalrinchhana chuan member kalkhawmte lawmna thu sawiin, kum hnih leh thla hnih zet  Champhai District-a a awm hnuah a hun a lo tawp ve dawn ta tih a tarlang a, he mi hun chhunga thawhpuina tha tak a dawn thin avangin lawmthu a sawi. Bawrhsap hian District Consultative Committee chu thutkhawm pawimawh tak, District sumpai che vel nghawng a ni, a ti a. Mipui leh bank-te inkarah thawhhona tha zawk awm se, banking system changtlung leh tha zawk pawh awm zel se a duh thu a sawi bawk a ni.

Vawiin thutkhawm hi a bik taka Financial Inclusion ngaihtuahna tur Special meeting a nih angin thutkhawm hian Financial Inclusion kaihhnawihn thil hrang hrang - Financial Literary Camp buatsaih  dan te, District chhunga ATM bun a nih tawh dan te, March 2025 hmaa District zawng zawng 100% Digitize tum a nih thu te, Digital Payment hman tlemna khua tihhmasawn dan tur te leh Telecom Service hmanga Financial Inclusion kalpui dan te thlirhoin an sawiho a. Hei bakah hian Champhai District chhunga Financial Inclusion kawnga la hnufual khua te chu Bank Branch hrang hrang ten chan insemin, hma an sawn theih nan hmalakna lo nei theuh se tiin an rel a ni.

He hunah hian Pu Mrinal Giri, Manager & Lead District Officer, RBI chuan ramdang nena insumdawn tawnnaah India pawisa (Indian Rupee – INR) a tam thei ang bera hman a nih theihna atan a ruahmanna awm te a sawi zau a. Mizoram chu state lian ni lo mah se, ram pahnih – Bangladesh leh Myanmar te nena ramri nei a nih avangin state pawimawh tak a ni, a ti a. Indian Rupee a tam thei ang ber hman a nih theih nan Bank-te chu sumdawng ten Special Rupee Vostro Account  an neih theih nana hma lo la theuh turin a ngen a ni.

Vawiinah hian thutkhawm danga rel tawh thin - Bank venhimna kaihhnawih leh District chhunga sum chet vel dan te pawh sawi ho a ni.

Vawiin thutkhawmah hian DCC member - Sawrkar department aiawhte, Sub Hqrs YMA aiawhte leh District chhunga Bank hrang hrang aiawhte an tel.