890/2024-2025

Aizawl the 21st June, 2024: Pi Lalrinpuii, Health & Family Welfare Minister chuan vawiin khan Mizoram Govt Nursing Service Association (MGNSA) 22^nd Biennial General Conference 2024 chu Conference Hall, Civil Hospital-ah a hmanpui.

Minister chuan Mizoram mipui vantlang hriselna kawnga Nurse-te pawimawhna leh an mawhphurhna san zia te sawiin, Nurse te hian an tawngkam khat lek pawh miin an dam phah sawng sawng theih thin avangin theihtawp chhuah lehzual turin a ngen a, Hospital enkawl thianghlimna leh faina kawnga an hmalakna te chu chhunzawm zel turin a sawm nghal bawk. Pi Lalrinpuii chuan Civil Hospitalin OPD Card online-a an issue ve thei ta chu chhuanawm a tih rualin, Hospital a damlo enkawlna kawnga record hrang hrangte fully computerised theih hun a nghahhlelh thu a sawi.

Pu HS Lalremtluanga, President, MGNSA chuan Nursing Directorate an neih ve tak avanga lawmthu sawina a nei a, Association hmalakna hrang hrang a tarlang bawk. Pu Lalhmingmawia Thangluah, Secretary in khawmpuia an thupui – “Nurse's role in infection control and prevention” chungchang sawi hawnna a nei a. Vawiin Conference-ah hian pension a chhuakte thlahna leh member boralte sunna hun pawh hman a ni.