889/2024-2025

Dated the 21st June, 2024: Nimin tlai lam khan Chief Minister Pu Lalduhoma chuan central sawrkar thara mi pawimawh hrang hrang leh All Finance Ministers' Meeting tel turin Delhi a thleng thla a. A thlen hnu lawkah Union Home Minister Pu Amit Shah chu a chenna inah a hmu a, inkawmna hun tha tak an nei.

Chief Minister hian Cyclone Remal in a Mizorama chhiatna hrang hrang a thlen chungchangah Union Home Minister hnenah hian Memorundum a thehlut a, Union Home Minister hian a hmuna endik tur Central Team a rawn tir chho ang a; report an thehluh veleh chhawmdawlna an ngaihtuah tur thu a lo hrilh.

Refugee chungchangah Central Sorkarin chhawmdawlna pek an tiam tih a lo hrilh bakah; Assam Rifles sawn chhuah chungchang pawh sawi dunin, Home Minister chuan thutlukna siamfel a ni tawh a, an insawn ngei dawn thu a lo hrilh a ni.
Hemi bawhzui hian Chief Minister hian Mizorama a haw hunah Assam Rifles, Home, PHE, PWD leh P&E Department te Joint Meeting a ko ang.

Pu Amit Shah hian Mizoram Sorkar hnuaia thawk tura Mizo Central Service Officers a dilte pawh tihhlawhtlinsak ngei a tum thu a lo hrilh a. Chief Minister -in August thla chhunga Mizoram tlawh tura a sawmna pawh tihhlawhtlin ngei a tum tur thu a hrilh a ni.

Chief Minister hi Pu Richard Vanlalhmangaiha, MP, Pu Vanlaldina Fanai, Commissioner & Secretary to Chief Minister leh Pu Jonathan Lalremruata, OSD to Chief Minister ten an tawiawm.

Pu Amit Shah nen an inkawm zawh hian Pu Tapan Deka, Director, Intelligence Bureau chuan Chief Minister hi Mizoram House ah a rawn hmu a, Mizoram harsatna hrang hrangte an sawi dun.