Vawiin khan Govt. Champhai College Seminar Hall-ah Disaster Management chungchang ah Training pawimawh tak neih a ni a. Chawhma lamah School Safety Programe chung changah Training neih niin Champhai District chhunga school 50 thlanchhuah zingah school 36 atangin Principal/Headmaster/Zirtirtute an kalkhawm a, chawhnu lamah chuan sawrkar office hrang hranga Head of Office-ten Disaster Management Plan siam dan an zirho bawk.
School Safety Programme chungchang-a training-ah hian Khuallian, Champhai District Bawrhsap Pu Vanlalngaihsaka, IAS chuan mihringte dan theihloh khuarel chhiatna avanga harsatna tam tak hi ruahmanna mumal tak leh inzirtirna tha a awm chuan nasa taka sutkian theih a ni tih sawiin zirtirtu kalkhawmte chu an school leh khawtlang theuh tana malsawmna an nih theih nan thahnemngai taka training turin a chah a.
Training hi ASO Pu Victor Lalmuanpuia, MCS in a kaihruaiin Champhai District Disaster Management Coordinator Pu P.C Zoramthara leh District Sports & Youth Officer Pu Lalngilneia Colney ten zirtirna an pe a ni. Zirtirtute hian anmahni school theuh atan Disaster Management Plan siamin, khuarel chhiatna lo thlen thulha him theih dan tur hi school naupangte an zirtir leh bawk ang.
Chawhnu lamah hian Champhai khawchhunga Head of Office zawng zawngten Disaster Management Plan siam dan tur chungchang zirhovin Training an neih chhunzawm a.
He training hi ASO/Nodal Officer Pu Victor Lalawmpuia, MCS in kaihruaiin, Champhai District Disaster Management Coordinator Pu P.C Zoramthara’n Training a pe a. He Training-ah hian Disaster Management Plan siam dan tur leh khuarel chhiatna thlen thulha rang tak leh awmze nei taka chhanchhuahna hna thawh anih theih dan turte zirho a ni a. Chhiatrupna hmachhawn theih dan ruahmanna siam dan zirtir a ni bawk. He training-ah hian Office hrang hrangten Disaster Management Plan siam dan tur chungchanga hriatthiam lohte zawtfiahin, sawiho tulte sawi ho nghal a nih bakah June ni 24 (Zirtawpni) hian Chanem Building leh Circuit House-ah Mock Drill neih nghal a ni ang.
