Vawiin chawhnu dar 2 khan Champhai Sub-Headquarters YMA Hall, Tlangrawt-ah Champhaia Remna Ni lawm dan tur chungchang ngaihtuahin Meeting neih a ni a, Organising Committee Member-te an tel tha hle.

Meeting hi Champhai Sub-Headquarters President Pu Lalbiakzaua’n a kaihruai a. Organizing Committee chuan Remna Ni programme sub-committee ruahmanna siam tawhte thlir hovin a pawm a. Remna Ni pual hian District Hospital leh District Jail bakah Home hrang hrangte chu an remchan anga Remna Ni puala programme buatsaih tura a ngen bakah heng hmunahte hian tanpuina pek a remti nghal bawk. Meeting chuan YMA Branch hrang hrangte leh Kohhran hrang hrangte chu Remna Ni puala Blood Donation Camp buatsaih tura ngen ni se a ti bawk. Central YMA kaihhruaina angin Remna Ni pual hian kohhran hrang hrangte tawngtai rualna nei tura ngen leh chhung tinte Remna Ni puala puan var zar vek tura ngen tha a ti bawk.

Remna Ni lawmna hi June ni 30-a lawm tur niin khuallian atan Parliamentary Secretary Pu TT. Zothansanga, Champhai North bialtu MLA ruat a ni a. YMA branch 15, MHIP Champhai Sub-Headquarters, MUP, Vengthlang Middle School Pipe Band, Kanan H/S leh Govt. G.M. H/S te pawh he hunah hian special item nei tura beisei niin mimal zaithiamte pawh sawm an ni bawk ang. Remna Ni lawmnaah hian Kohhran aiawh leh Political Party aiawhte atangin thusawi ngaihthlak a ang a, programme hi mipui tel tam theihna tur leh mitin huapzo tura ruahman a nih avangin Sawrkar Office leh zirna in hrang hrangte pawh he hunah hian tel vek tura sawm an ni bawk.