Vawiin chawhma dar 11 khan Champhai District Fire Prevention Committee chuan DC Conference Hall-ah Champhai District chhunga kangmei ven kawnga hma la thalo khaw VC-te ko khawmin insawifiahna hun a pe.

Champhai District Bawrhsap kaihhruai District Fire Prevention Committee chuan sawrkar thupek zawm lova April ni 15 hnu lama lo hal khaw riat - Selam, Tualcheng, Neihdawn, Thekte, Vaphai, Chawngtui 'E', Mualkawi leh Pamchung khaw VC-te chu an lo hal tlai chhan insawifiah turin a ko a. He huna tel ve theilo, Selam VC leh Chawngtui 'E' khaw VC koh leh a an lo hal tlai chhan ngaihthlak a nih hnuah Committee hian The Mizoram (Prevention and Control of Fire in the Village Ram) Rules, 2001 an bawhchhiat dan a zirin hremna a chelek dawn a ni.

Champhai District Fire Prevention Committee hian dan phalloha kawngkam vat chhuak khaw nga - Dulte, Chhungte, Dilkawn, Chawngtlai leh New Chalrang khaw VC-te a ko khawm bawk a. He huna inlan Dulte, Chhungte leh Chawngtlai khaw VC-te chu insawifiahna hun pek an ni a. Vawiina inlan theilo khuate koh an nih hnuah kawngkam reserve vat chhuakte hremna pawh a tul angin Committee chuan a la rel dawn a ni.

Kumin chhunga lo hal vang leh thildang avanga ram tikang khua - Hmunhmeltha, N. Khawbung, Melbuk, Zokhawthar, Ngopa, Kawlkulh, Hliappui, Hrianghmun, Melbuk, Tlangsam, Vengthar leh Hnahlan te pawh District Fire Prevention Committee hian insawifiah turin a ko leh dawn a ni.

Champhai District Fire Prevention Committee hi an Chairman Pu Vanlalngaihsaka, IAS, Champhai District Bawrhsap-in a hova. Committee membe-te an tel tha hle a ni.