Vawiin khan Chief Minister Pu Lal Thanhawla'n New Secretariat Complex ah Sinlung Hills Development Council (SHDC) Cell Office sakna tur lung phum a phum a. He hunah hian Home Minister Pu R. Lalzirliana; Finance Minister Pu Lalsawta; Deputy Chief Whip leh Tuivawl bialtu MLA ni bawk Pu R.L.Pianmawia; Parliamentary Secretary leh Serlui bialtu MLA ni bawk Pu K. Lalrinthanga te an tel a ni.

Chief Minister Pu Lal Thanhawla chuan Sinlung Hills Development Council (SHDC) hi chi lak bingna atana siam leh ruahman a ni lova tiin hmasawnna te a tlak ruala, hnufual bik awm lova pheikhai rual taka Mizoram leh Mizo ten hmasawnna kawng kan zawh tlan nan a ruahman a nih thu sawiin chutiang tura kan dawnsawn hi a pawimawh hle a ni, a ti a. Zo hnahthlak hmun hrang hranga awm ten Mizoram hi Zofate Jerusalem a ni tih an pawm thei nan a ruahmanna peng khat a ni tih hriat a pawimawh bawk a ni a ti a. SHDC chu Zoram pum chhun engtu ni tura a duhsak thusawiin he rahbi tuk tharna hian Zofate tan malsawmna, inpumkhatna leh hmasawnna thlenna kawngah beiseina sang tak a neih thu a sawi bawk. 

Hnam inpumkhatna a pawimawh leh a tul zia te sawi langin Pu Lal Thanhawla chuan in la hrang tur tumah kan awm lo a ni a ti a. Zofate te hi sakhaw lian tak tak pathumin min hualbet chungin Thlarau Thinghlim in min zawng chhuak a, he hi Pathianin awmze neiin Zofate hi a hman duh vang a ni a.  Inpumkhata, khawvel hmun tina thil siam tinreng te hnenah Chanchin Tha hril tura kohchhuah hnam kan ni tih kan hriat leh kan chian a ngai a ni, a ti a. Tharum chu Krista hmanrua anih loh thusawiin sim duhtute remna siampui chu Ringtute tih tur a ni a, a ti a.

Chief Minister chuan hmanni lawka Myanmar a tlawhnaah Khawchhaka Zofate, Sawrkar nghenchhan lova kawng hrang hranga anmahni leh anmahni an intodelh a hmu chu ropui a tih thu sawiin khawchhak leh Manipur lama awm Zofate leh Zo hnahthlak atangin mahni intodelhna kawngah leh Sawrkar nghenchhan lova khawsak zirnaah Mizorama awm Zofa te hian zirtir kan nei a ni, a ti.

He lungphum phumna puala inkhawmna a inlawmna thusawitu Pu Hmingchungnunga, Chairman, Sinlung Hills Development Council (SHDC) chuan Sawrkarin SHDC Cell Office sakna atana hmun a peknaaah leh a sakna tur bultanna sum cheng nuai 40 a ngaihtuah sak avangin lawmthu a sawi a. Programme hi Pu Lalfela Sailo, Secretary, SHDC in a kaihruai a ni.