Champhai District Disaster Management Committee (DDMC) leh National Disaster Response Force (NDRF) tangkawp buatsaih  chhiatrupna thlen thulh pawha chet lak dan tur inzirtirna  ni 5 awh tur chu vawiin khan Champhai College Multipurpose Hall-ah neih tan a ni a. Vawiin chawhma lamah Sawrkar Office hrang hranga thawktute leh Zirtirtute tan buatsaih niin, chawhnu lamah College Zirlaite pualin neih a ni.

Training hawnna hunah hian Addl DC Pu Alexander V. Chongthu  chuan Champhai rawn kalchilha training rawn pe tu 1st Battalion NDRF Team-te chungah lawmthu a sawi a. Training chhim tura kalkhawmte lawmna thu sawiin, training tha tak leh hlawkthlak tak hmang theuh turin duhsakna a hlan a ni.

Vawiin training-ah hian Pu ND Bora, Inspector, 1st Battalion NDRF in Powerpoint Presentation hmangin NDRF leh Disaster Management chungchang a sawi zau a. Disaster Management Training tawi hmangin tualchhung mite chhiatrupna lo theln thulh pawha rang taka chet lak dan zirtir an nih tur thu sawiin,  Disaster Management Team-te lo thlen hmaa chhiatna tam zawk a thlen lohna tura tualchhung mite training pek chu thil pawimawh tak a ni a ti. He hunah hian NDRF team member ten chhiatrupna lo thlen thulh pawha chet lak dan tur hrang hrangte tarlangin lemchan hmangin an entir nghal zel a ni.

National Disaster Management Authority (NDMA) hnuaia peng pawimawh tak National Disaster Response Force (NDRF) hi Disaster Management Act, 2005 zulzuia January Ni 19, 2006 a din niin, tun dinhmunah India ramah Battalion 12 awm mekin 3 dang siam leh tura hmalak mek a ni. NDRF Battalion-te hi chhiatrupna thleng thei dinhmun emaw, a lo thlen thulh pawha chhanchhuah hna thawka chet la vat tur thiamna bik nei training tha tak pekte an ni a. NDRF te kaihhruainain kum 2017 khan Champhaiah  chhiatrupna thlen thulh a chet lak dan tur hrang hrang zirho a lo ni tawh a. North East bikah NDRF Battalion 2 awmin, tun tuma Champhai rawn tlawhtute hi Guwahati hmuna inkhuar 1St Battalion NDRF te an ni a. Training hi Zirtawpni thlenga neih tur niin, hemi hun chhung hian Zirna In, Police leh NGO te pualin training hi buatsaih tum a ni.