Vawiin khan Champhai DC Conference Hall-ah District Development Coordination and Monitoring Committee (DISHA) chu an chairman Lok Sabha MP Pu CL Ruala hovin an thukhawm a. Champhai District chhunga sawrkar laipui scheme te kalpui dan an thlirhoa, hmalak zel dan tur an enzui bawk a ni.
Chairman Pu CL Ruala chuan department hrang hranga thawk officer kalkhawmte chu te ram hmasawnna atana mi pawimawh tak an nih thu a sawi a. Thahnem ngai taka hna thawk thin tur leh hnathawhna hmuna sulhnu tha tak hnutchhiah theuh turin a chah a ni. Meeting-ah chuan ngaihpawimawh zawngte tlang taka sawiho tur a ni a ti a. DISHA meeting-ah Mizoram chu India rama ti tha ber pawl kan nih thu a tarlang nghal bawk a ni.
Co-chairman Pu Ronald Sapa Tlau pawhin thusawiin meeting chu kalphung pangai anga neiha tin leh mai tur a koh a nih loh thu sawiin champhai district hmasawnna leh kalzelna tura ruahmanna siamna tur a ni, a ti a. Kalkhawmte chu rilru puitling tak pua hriatreng tlak hna thawk turin a fuih nghal a ni.
MGNREGS hnuaiah 2017-18 August thla thlengin ni 38 inhlawhna siam niin, Champhai District-ah Job Card 28,478 a awm mek thu tarlan a ni a. PMAY-G ( Rural Housing Scheme) hnuaiah In 102 sak zawh tawh niin IWMP Project paruk thawh tawh niin pakhat tihtawp a ni a, 6 dang chu kalpui mek a ni
PMGSY hnuaiah kawng 13 siam a ni a. Irrigation Department hnuaiah PMKSY (Har Khet Ko Pani) tih hmangin Projects 4 kalpui a ni a. RMSA hnuaiah Shaala Sidddhi ( School Evaluation ) leh Kala Utsav te neih a ni a. School fai lawmman Swachh Vidyalaya Puraskar lawmman dawngtu school 9 awmin India rama District malah chuan a titha ber dawttu a ni bawk a ni.
Swacch Bharat Mission (SBM) hnuaiah hnawmbawm sem, Fai inzirtirna Campaign leh ODF re-certification Champhai, Khawzawl, Khawhai leh Biate-ah te neih a ni bawk. Fishery Department hnuaia hmalakna Blue Revolution hmangin mi 144 te hnenah Dil thar siamna leh a hlui cheithatna tur tanpuina sum pek a ni. Kumin April-August thla chhungin Naupiang dam tha/ dam lai 966 awmin IMR chu 17.59 a ni a. Nu nauchunga thi 4 an awm bawk a ni.
National Social Assistance Programme (NSAP) hnuaiah tar chawmna mi 2774; widow pension mi 269 leh disable pension mi 75 te hnenah pek mek a ni. Midday Meal kalpui dan chu tha thawkhat a hriat ani a. Aadhar Enrolment pawh chak taka kalpui ni in Bank account leh aadhar thlunzawm ah pawh Champhai District chu a ti tha ber pawl a ni.
Meeting ah hian Champhai District chhunga MLA; Pu JH Rothuama, Pu Lalrinliana Sailo, Pu TT Zothansanga leh Pu T. Sangkunga te an tel a. Heng bakah hian sawrkar department hotute, khawtlang hruaitu leh NGO aiawh te an tel a ni.
