Vawiin khan Tuipui khuaa Tomato chingtute thar chhuah hmasa Quintal 100 zet chu hmun dang a hralh chhuah turin Tuipui khua atangin Horticulture Minister Pu PC Lalthanliana'n a vailiam.
He hunah hian Minister Pu PC Lalthanliana chuan thu sawiin Kuthnathawktute thar chhuah dehralna tur sorkarin a zawn sak mek thu leh tam zawk thar chhuak thei tura tanlak chhoh mek anih thu a sawi a. Kuthnathawktuten an thlai thar chhuahah hlawkna an tela man man zawka an hralh theih nan kharchhawngtu tihbo a tul thu a sawi a. Horticulture Department hmlak nain Loneitute thlaihmun thlenga kal theihna tur kawngpui (Link road) siam nan Cheng Vaibelchhe 27 dah anih thu a sawi bawk a ni.
Tuipui khua a chhungkaw 41 ten eizawnna atana an hman an khaw chheh vel Zau hrang hrang a Tomato an chin chu thar tan mekin, vawiin khan Horticulture Minister Pu PC Lalthanliana chuan heng Tomato chinna hmun te hi a hmunah a tlawh a. Kuthnathawktute dinhmun dik tak hrechiang tura an thlawhhma ngei a tlawhtu Minister leh Horticulture Department hotute chungah Tuipui khua a Tomato chingtute chuan lawmthu an sawi .
Tomato chin hun pangnai hi thlasik a ni chungin fur laia phai lam atanga Tomato lo lut thinte a man ato em thin avangin Horticulture Department chuankuthnathawktute tan Fur laia chin theih tur Tomato chi a ngaihtuah sak a. KVK nen tangkawpin Tuipui khua-ah hian nikum atang khan Tomato hi hlawhtling taka chin a ni a.
Tomato hi India rama thlai chin uar berte zinga mi nimahse, Tomato natna Leaf Curl Virus Bacteria Wilt leh Early Blight te a hluar vangin a rah thar chhuah 70% chuang vel a tlak hniam phah thei hial a. Chutih rualin heng natna thlen ture hi a sutkian nan Indian Institute of Horticulture Research Bangalore chuan Variety thar Arka Rakshah leh Arka Samrat a siam chhuak a. Heng Tomato te hian natna an do theih bik vang in Mizoram a kut hnathawktute chin turin a chah chhuak a. A dehralna lamah harsatna a awm theih thin avangin tum khat a thlai thar teuh hi hralhna lamah a hnawn theih avangin a tahtawl a chin tir an ni. Tuna Tuipui khua in Tomato an chin atang hian Quintal 900 vel thar chhuah beisei niin, man man zawk a kuthnathawktuten an thar chhuah an thar chhuah theih nan sorkar chuan thlai chi hrang hrang chin hun tur fel takin a bithliah sak mek a ni.
He hun hi Khawzawl Division Horticulture Officer Pu F. Lalthlamuana kaihruai a. Horticulture departmena Director Dr. Elizabeth Saipari, Horticulture department thawktute, khawtlang hruaitu leh kuthnathawktute an tel a ni.
