Vawiin chawhnu khan Chief Minister Pu Lal Thanhawla chuan Mizoram University-ah NEDP peng pakhat MEDMOC in a buatsaih Entrepreneurship Summit 2017 leh Mizoram Kailawn Business Plan Contest a buatsaih kharna hun a hmanpui a. E-Summit 2017 leh B-Plan Contest hi MEDMOC leh IIM Calcutta Innovation Park(IIMCP) tangkawpin Entrepreneurship Development Scheme(EDS) hmalakna huang chhunga an buatsaih a ni a; he intihsiakna hnuaia sumdawnna kawngthar rawtchhuak tu zinga ti thazual te hnenah Chief Minister Pu Lal Thanhawla'n lawmman leh sumdawnna bultanna atana tanpuina sum fai a hlan a ni.
Chief Minister Pu Lal Thanhawla chuan India ram thang mek zelah Mizoram chu a awm mai mai bik lova, state hmasawn ber te zinga mi ni turin theih tawp a chhuah a; chumi kawnga a thil tumte tih hlawhtlin nan NEDP chu duan a ni a ti. NEDP hnuaiah Entrepreneur te tih hmasawn chu ngaih pawimawh zual bik a nih thu a sawi a. Tunhma lamah sawrkar hna mi zawng zawngin thawh lo tum thin mahse tunah chuan sawrkar hna thawh tur a tlem piah lamah mahni kutke a din, enzawnna insiam chawp leh midang te tana eizawnna hna siam tum thalai an pung a lawmawm hle a ni a ti a. Mahni kutkea din tum, indap chawp leh midang te eizawnna tur hna tam tak siam thei nih chu khawvel in a ngaihsan a ni a. Chutiang mi leh chutiang ti thei tur chi Mizoramah thalai tam tak an inphum tih kan hriat avangin kan rilru a hlim hle a ni a ti a. Sawrkar in a theihna zawnah anni ang puih phu te chu theih tawpa chhawmdawl leh bul tan thlengin a tum tih a sawi a. "Sawrkar chuan hmalakna tha tak tak sum leh paia intodelhna tur kawngah te pawh duangin lo thanglian dawn teh reng pawh ni se; kan in nghahna tur leh kan thanlen zelna kawnga dinhmun pawimawh ber luah tur te leh hmalam pana kan economy nawrkaltu turte chu entrepreneur te tho an ni", a ti.
Finance leh Planning Minister Pu Lalsawta pawhin Mizoram hausak theihna kawng awmchhun chu Agriculture & Allied Service Sector a nih thu a sawi a. Huan thlai, buh leh bal te tam zawka thar tur leh hausakna sum leh pai a chantir tur chuan Agriculture & Allied Service Sector behchhana Entrepreneur hmalakna leh inzarpharhna a pawimawh berah sawrkar chuan a ngai a ni a ti.
E-Summit 2017 leh B-plan Contest Result puan leh lawmman semna hun hi Chief Secretary Pu Lalmalsawma'n a kaihruai a. He hunah hian B-plan Contest a dilna thehlut mi 287 zinga intihsiakna paltlang mi 254 zinga Final Round lut mi 10 zinga mi 5 te chu tanpuina sum leh chawimawina thuziak hlawmman atan hlan an ni a. Hemi zawh hian IIMCIP Director Dr. Subhrangshu Sanyal chuan IIMCIP in entrepreneur 50 zawnchhuah a huaihawtna a tel tura Mizo thalaite sawm in hun a khar a ni.
MEDMOC leh IIMCIP buatsaih B-plan Contest 2017 a top 10 te chu pakhatna hauh a Rs 4 Lakh dawngtu Lalsiamthara, Serchhip Changel hmanga thilsiamchhuah dan duangtu(Papyrus Mizoram), Pahnihna hauh a Rs 3 Lakh dawngtu, Lalhlupuii Ralte, Ramhmul Damdawi siamchhuah, Pathumna leh Rs 2 lakh dawngtu Lalawmpuia Pachuau, Bio Gas, promising idea vanga lawmpuina sum Rs 50,000/- ve ve dawngtu te - Michael Hmingthanpuia(Alternate Tourism) leh Lalnunsiami Pachuau te bakah top 10 a lang midang 5 - Lalrinsanga, Evangeline Hmar, Mark Lalduhsaka, Raymond Remlalmuana leh Rakili te an ni.
