Vawiin chawhma khan Commerce and Industries Department buatsaihin Champhai Vengsang YMA Hall-ah NLUP 3^rd Phase ( Final Instalment),4^th Phase (Second Instalment) leh NLUP-NEDP Convergence ( First Instalment) Champhai North Cluster huamchhunga  beneficiary-te hnenah tanpuina sem a ni a. He hunah hian  Champhai North bialtu MLA Pu TT Zothansanga chu khuallian niin NLUP tanpuina a sem a ni.

Pu TT Zothansanga chuan Commerce and Industries Department hmalaknaa NLUP hnuaia  Third Phase leh Fourh Phase mai bakah NLUP-NEDP atana tanpuina sem a ni chu lawmawm a ti a. NLUP chu sawrkar flagship programme anih thu leh a dawngturte pawh fimkhur taka NGO-te nena baseline survey neia thlanchhuah an ni a, tumah duhsak bik an awm lo, a ti a. A hlawhtlin leh tlin loh enzuina monitoring pawh mumal taka kalpui anih thu sawiin a titha duh lo mi engemawzat chu hrem an ni tawh a ni, a ti a. NLUP chu kalpui zel tur anih thu sawiin tih tak zeta hnathawkte, rahbi tleu leh tangte chhawmdawl zel nan NEDP (New Economic Development Policy) siam a ni, a ti bawk. Champhai North bialtu MLA chuan Aizawl- Champhai kawngpui chu kumin March ni 31 atang khan BRTF hnen atangin Mizoram PWD kutah  hlan a ni, a ti a; kumin ruahtui tla nasa avanga siamna hun a awm loh mai bakah lirthei lian engemaw zatin an zawh ve reng vangin a chhiat phah thu a sawi a. Siamtha turin sawrkarin theihtawp a chhuah thu sawiin Keifang Quarry atanga lung lain kawng tluanin siam tha tur camp-te siam a ni a, YMA Conference hma ngeia thawmthat tura chak taka hmalak mek a ni a ti. Aizawl- Champhai kawngpui Double lane-a siamna tur pawh DPR peihfel vek tawh chu sawrkar laipuiah thehluh a ni a, an pawm ve leh hna tan nghal anih tur thu a sawi bawk. Sawrkar hnalak chungchangah dik taka kalpui anih thu tarlangin a tling leh chhawrtlakte chauh lak anih theih nan advertisement felfai taka siam a ni tiin MPSC kaihhruaina hnuaiah hnalak dik taka kalpui thin a ni a ti bawk. Tanpuina sum dawngtute chu duhsakna hlanin taima leh rinawm taka thawkin mahni trade thlan theuhte tipuitling theuh turin a chah a. Industry eizawnna tlak din thei tura tan la sauh sauh tur leh hna zawngtu leh tanpuina dawngtu ni  lova hna siamtu leh midangte tanpui theitu  ni zawk turin a fuih nghal a ni.

NLUP semna inkhawm hi Pu R.Laltanzuala, Functional Manager, District Industries Centre (DIC) Champhaiin a kaihruai a. Pu Lalremthanga, Skill Worker-in report tlangpui pein kalkhawmte hriattur tulte a sawi a. Pi Lalthangveli DIC Staff-in lawmthu sawiin hun a khar a ni. Commerce and Industries Department hnuaia Trade hrang hrang vawiina tanpuina semna te chu: Petty Trade, Electronic Repairing, Steel Fabrication, Automobile Work, Rice Hulling, Backery, Tailoring, Handloom, Petty Trade-I, Carpentry-I, Carpentry-II, Shoe Repairing, Desktop Publishing, Beauty Parlour-ah te a ni. 

Vawiina NLUP tanpuina sem chhuah takah hian 3^rd Phase Final Instalment hnuaia Trade hrang hrang 8 dawngtu Beneficiary mi 66 te hnenah cheng nuai 18.10 sem  a ni a. Fourth Phase Second Instalment hnuaia Trade hrang hrang 11 dawngtu Beneficiary mi 58 te hnenah cheng nuai 28.07 sem niin NLUP-NEDP Convergence hnuaia Trade hrang hrang 3 dawngtu Beneficiary mi 4 te hnenah cheng nuai 2 sem chhuah a ni bawk. Vawiina NLUP tanpuina Beneficiary mi 128 hnena sem chhuah  hi avaiin cheng nuai 48.18 a ni.