Vawiin chawhma khan Champhai DC Conference Hall-ah District Consultative Committee (DCC) & District Level Review Committee (DLRC) chu Bawrhsap Dr Naveen Aggarwal, IAS kaihhruaina hnuaiah neih a ni.

Chairman Dr. Naveen Aggarwal chuan Bankers kalkhawmte chu  mipuite hnenah a zau thei ang bera Bank kaltlanga hamthatna awm angte puangzar tura chahin mitinin Bank hnathawh leh kalhmang an hriat angaih thu a sawi a. Bank kaltlang hamthatna diltu ti tak takte a tul ang zela lo pui thin turin a chah bawk.

He Meeting-ah hian Pu  L.Lawmvela,  Lead District Manager, SBI Lead Bank Office Champhai chuan kalkhawmte lawmna thu a sawi a  Meeting-ah hian kumi June thla quarter   chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho a ni a. Meeting chuan Champhai a  Bank hrang hrangten CTS Cheque Scan System an hman ve theihna thuneitu sang zawkte hnena hma lakpui tura ngenna  siam nise tha a ti a. Mipuite hnena zau zawka Fiancial Literacy Camp kalpui tha tih a ni a. Banker-te puala Training Cum Workshop neih, Currency Retention Limit tihsan tura hmalak leh data felfai taka vawng tha tura hmalak tha tih a  ni bawk.

Meeting tarlan dan chuan June Quarter zawh  thlenga Champhai District-a Bank hrang hrangte Credit Deposit (CD) ratio khaikhawm chu March 2019 quarter tawp aia za zela 6.95 a tla hniamin 45.91% a ni a, hei hian CD Ratio bituk zat za zela  60 chu a phak lo  a ni.  Priority Sector tana loan pekchhuah zat chu za zela 66.53 a ni a, hei hian bituk za zela 40 chu   a khum a ni. Agricultural Segment hnuaia loan pekchhuah zat chu za zela 19.45 a ni a, hei hian bituk zat za zela 18 chu a khum bawk a ni. SLBC kaltlanga CLSS Housing Loan (PMAY) UD&PA Champhaiin a pawmsak mi   200 an awm a.  Kisan Credit Card Loans mi 107 hnenah cheng Nuai 484.47 hu pekchhuah hman a ni a, DAY-NULM hnuaia Self Help Group 1 hnenah Nuai 4, NRLM-MzSRLM-SHG 4 hnenah cheng nuai 5 pekchhuah a ni bawk. 

Hemi Quarter chhung hian Housing Loan 48, cheng nuai 456.90 pek niin, Education Loan pekchhuah  awm lo a. Priority Sector Advances hnuaiah Recovery chu 47.58% niin quarter hmasa 16.58%  aiin a sang a, Gross NPA % chu 9.42  niin quarter hmasa 10.38 aiin a tlahniam a ni.  Pradhan Mantri Mudra Yojana (PMMY) hnuaiah mi 432 (Shishu-246, Kishor-156, Tarun-30) hnenah loan cheng nuai 2250.73  hu pekchhuah a ni a. Hemi hun chhung vek hian Thingtlang/Zokhaw mite tana bank hman dan zirtirna Digital Financial Literacy Awareness Programme tum 20 neih niin, hemi hmang hian mi 1848 te chu zirtirna pek an ni a. Heng bakah hian Lead Bank pawhin a hranpain FLC hi tum 4 huaihawtin mi 108 te zirtirna pek an ni. Kum 2018-19 chhung khan   Self Help Group 101 te tan Saving Bank Account hawn a ni a, mi 5313 te tan Basic Savings Account hawn sak a ni bawk.

Social Security Scheme hnuaiah  bank kaltlanga  Cashless transaction  pek niin, Pradhan Mantri Suraksha Bima Yojana (PMSBY) hnuaiah mi 1374, Pradhan Mantri Jeevan Jyoti Bima Yojana (PMJJBY) hnuaiah mi 1170, Atal Pension Yojana (APY) hnuaiah mi 47 leh  RUPAY Debit Card hmangtu mi 3522 an awm thu tarlan a ni bawk a. Heng bakah hian Bank Security te sawiho anih bakah inkaihhruaina tha zawk awm theih dan turte sawiho niin , Bank tinte pawh chak zawka hma laa, hunbi nei thlapa Data thehlut thin tura tih an ni.

Champhai District-ah Bank branch 23 a awm  leh ATM 13 a awm mek a ni.