Vawiin khan Secretariat Conference Hall, Mizoram New Capital Complex-ah “State-Level Steering Committee for Celebration of Pawl Kut” chu an Chairman Dr. K. Beichhua, Social Welfare & Tribal Affairs kaihhruaina hnuaiah kumin November thla a “Pawl Kut” hman tur atana inbuatsaihna kal mek an thlirho.

Ruahman lawk dan chuan Pawl Kut hi Mizoram chhung district headquarters zawng zawngah lawm tur a ni a, November ni 13-15, 2019 chhunga lawm tur niin, Aizawl district tih loh district headquarters zawng zawngah District bawrhsap kaihhruaina hnuaiah District-Level Committee din tur a ni ang.

Pawl Kut hi naupang pual a nih angin middle school leh secondary high school zirlai naupangte tan mizo hnam lam leh pipu zai intihsiak buatsaih a ni dawn a, mizo infiamna chi hrang hrangah intihsiakna buatsaih a ni bawk ang. Hei bakah hian painting exhibition te, costume parade te neih a ni bawk ang.