Vawiin khan Poshan Abhiyaan (National Nutrition Mission)  hnuaia Rastriya Poshan Maah (National Nutrition Month) kalpui mek hnuaia hmalakna pakhat Poshan Rally chu Darthangvung Traffic Point leh DK Traffic Point inkar Champhai Vengthlangah neih a ni a. Hemi hnu hian Poshan Maah hnuaia theme hrang hrang hawi zawnga hriattur pawimawh hrang hrangte inhrilhhriatna hun Govt.  Vengthlang P/S II ah neih chhunzawm a ni.

Rally neih hma programme tawi buatsaihah  Pi WC Zorammawii, CDPO Champhai leh DPO charge la mektu ni bawkchuan thusawiin, Sawrkar laipui ruahmannain kum 2018 March thla atangin Poshan Abhiyaan kalpui tan anih thu leh September thla bik chu Poshan Maah-National Nutrition Month atana hman thin anih thu a sawi a. Poshan Abhiyaan hnuaiah hian India khua leh tui ten eitur tha leh hrisel taksain a mamawh angte an ei a, natna laka an fihlim theihna tura hmalak a ni, a ti a. Poshan Rally hmangin hemi kawnga inzirtirna hi mipuite thleng phakl tura zau zawka puanchhuah tum a ni, a ti bawk.

Poshan Rally hi Champhai Vengthlanga Darthangvunga Traffic Point leh DK Traffic Point inkarah neih niin, he hunah hian Zirlai naupang, Anganwadi Worker leh naupang, NGO, Chanchinbumi, ASHA,   Health Worker bakah line department aiawhte an tel tha hle a. Chawtha ei pawimawhna leh hriselna kawnga inzirtirna lam hawi ten aurualna neih a ni a. Poshan Rally zawh hnu hian Govt. Vengthlang P/S II ah Anganwadi Worker, ASHA leh Health Worker-te pualin Poshan Maah theme lamhawia training neih chhunzawm a ni a. He hun Pi Rebecca Laldinmawii Hrahsel, BDO kaihhruaiah hian Dr. Lallawmkima, DIPRO-in  Hygiene and Sanitation tih thupui a sawizau a. Pi C.Lalramengi, DPM, NHM in Defeat  Diarrhoea Campaign chungchang zirtirin, Pi K.Lalengliani, RKSK Coordinator-in  Anaemia Prevention Campaign leh Iron Rich Food tih chungchangah zirtirna  a pe bawk a ni.