Vawiin hian Pu C. Lalrinsanga, Minister, Agriculture, Irrigation & Water Resources, etc chuan Khawlailung, Chekawn leh N. Vanlaiphaite a tlawh a. Khawlailunga khawtlang hruaitute nen an inkawmnaah Minister chuan Kurtai thar chhuak tam, khaw taima Khawlailungah Kurtai siamna Jaggery Unit bun a nih tur thu hrilhin Fu thar chhuah tihpun a tul hle dawn a ni a ti a. Kan rama Agriculture Link Road kan neih ang ang te rigid pavement (cement-a zut khawng) a a tam thei ang ber neih sawrkarin a tum thu leh Farmer Pension Scheme tha tak Mizoramin a neih thuai dawn thu a sawi bawk.

Khawlailunga hun a hman zawh hian Chekawn panin Chekawn khawtlang hruaitute nen inkawmna an nei leh a. Chekawn khawtlang hruaituten khawtlang mamawh an lo thlen a ni.

Hemi zawh hian N. Vanlaiphai pan lehin N. Vanlaiphai Forest Rest House ah Pi Dorothy Muansangi, MCS, SDO Civil kaihhruaiin vantlang inkhawm an lo buatsaih a, inkawm hona te neiin khawtlang hruaituten loneitute leh leilet neite, huan siam tute hmasawnna tur mamawh hrang hrang an lo thlen a. Minister in N. Vanlaiphai a tlawh avangin lawmthu an hrilh a ni.

He hunah hian Minister chuan, N. Vanlaiphai chu leilet nei tha khua an nih avangin tlawh a duhna a rei tawh thu sawiin, Sub Divisional Agriculture Officer an dilna chu Cabinet lama chhawpchhuah tur a la nih thu a hrilh a. He sawrkarin a tum lian ber chu ei leh bara intodelh a ni a, ka chokaa mikhual cham rei, hnam dang tharchhuah thlai chi hrang hrang nitina kan eiral thin te hi hnawh chhuah a. Keimahni ngeiin thar chhuah kan tum a ni, a ti. N. Vanlaiphai hi tunhma atanga Alu tha taka lo tharchhuak tawh thin in nih avangin tunah hian True Potato Seeds, in chin pun tur kan rawn pe leh dawn che u a, chutiang bawkin thlai dangte pawh a chi tha kan ngaihtuah zel dawn a ni, tiin Agriculture lama hmalakna tur ruahmanna te a hrilh a. Loneitute hi he ramin hma a sawn theih nan mi pawimawh in ni a, in hmasawnna tur in tharchhuah a pun theihna turin nasa takin hma kan la zel dawn a ni, tiin a hrilh. Pu C. Lalrinsanga chuan, loneitu kum 14 atanga 40 inkar te tan Mizoram sawrkar chuan Pension Scheme thar a ruahman sak thusawiin, loneitu chuan thlatin sum chhunluh (premium) tlem te te a pe ang a, kum 60 a tlin hnuah thlatin pension a dawng ve thei tawh dawn a a tangkai hle dawn a ni, a ti. Tin, crop insurance scheme pawh kalpui tura ruahmanna siam mek a nih thu a hrilh bawk.

Pu. C. Lalrinsanga hian N. Vanlaiphaia Agriculture Department hmun hma leh KVK hmun hma te leh sawrkar hmun pawimawh dang te a tlawh kual zui a. KVK ah hian Dr. T. Vanlalngurzauva, Sr. Scientist & Head chuan an mamawh hrang hrang te a lo thlen a. Pu Kenny Zohmingliana, Agronomy Scientist chuan KVK hnathawh dan tlangpui Powerpoint presentation hmangin a sawifiah a ni. Minister hian, sawrkarin KVK pawimawhna leh an hnathawh tangkai zia a hriat avangin District thar pathumah pawh hian KVK dah nghal a nih theih nan sawrkar laipuiah dilna an thlen tawh thu a sawi a. N.Vanlaiphai KVK in Pa chi siamna an lo dil chu an neih ngei a tul hle nia a ngaih thu sawiin, Loneitute chu KVK mithiam te hman tangkaia pan fo turin a ngen a ni.

Minister hian N. Vanlaiphaia sawrkar hmun hma dangte pawh a tlawh bawk a ni.

Pu. C. Lalrinsanga hi Aizawl atangin Er. Lalrotluanga, CE, I&WR Department in a tawiawm a, Serchhip atangin Pu Lalringliana, SDEO leh official dangten an tawiawm a ni.

Attachment

  • Loading attachment...