Vawiin chawhma khan Champhai DC Conference Hall-ah District Consultative Committee (DCC) & District Level Review Committee (DLRC) chu Bawrhsap Pu SL Naveen, IAS kaihhruaina hnuaiah neih a ni a. Champhai Bawrhsap chuan mipuite’n Bank kaltlanga hamthatna an chhawr tangkai theihna turin Banker-te a zau thei ang bera zirtirna nei turin a chah a. Undivided Champhai District tana ‘Potential Credit Linked Plan (PLP) 2020-2021’ buatsaih chu a tlangzarh nghal a ni.

He Meeting-ah hian Pu L.Lawmvela, Lead District Manager, SBI Lead Bank Office Champhai chuan kalkhawmte lawmna thu a sawi a. Kalkhawmte’n inhmelhriattirna an neih hnuah nikum September thla thlenga Champhai District chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho a ni.

Meeting tarlan dan chuan September Quarter zawh thlenga Champhai District-a Bank hrang hrangte Credit Deposit (CD) ratio khaikhawm chu 45.03 % a ni a, hei hian CD Ratio bituk zat za zela 60 chu a phak lo a ni. Priority Sector tana loan pekchhuah zat chu za zela 66.45 a ni a, hei hian Commercial Bank tana bituk za zela 40 chu a khum a ni. Agricultural Segment hnuaia loan pekchhuah zat chu za zela 17.49 a ni a, hei hian bituk zat za zela 18 chu a phalo deuh a ni. Export, Education and Housing Advance chu za zela 41.09 niin, Education loan pekchhuah a awm loh laiin, Housing Loan pekchhuah hian za zela 46.28 a pha a ni. 2019-2020 chhunga Prime Minister Employment Generation Scheme (PMEGP) hmanga Champhai District-a target 64 atanga 14 te hnenah September, 2019 thla ral thlengin loan cheng nuai 135.77 pekchhuah a ni a. Pradhan Mantri Awas Yojana (PMAY) hnuai target 150 zinga 7 te hnenah loan cheng nuai 22.09 pekchhuah a ni bawk.

Kum 2019-2020, September quarter tawp thlengin Pradhan Mantri Mudra Yojana (PMMY) hnuaiah mi 84 (Shishu-28, Kishor-46, Tarun-10) hnenah loan cheng nuai 197.55 hu pekchhuah a ni a. DAY-NRLM hnuaih kum 2019-2020 chhunga Self Help Group target 359 zinga 104 te hnenah cheng nuai 107.43 hu loan pek a ni a, Loan Recovery Percentage hi 20.23 % niin, duhthu a sam lo hle a ni. DAY-NULM hnuaia target 65 zinga 30 te hnenah loan cheng nuai 41 pek a ni bawk. Reporting period chhung vek hian SHG 24 te Saving Account hawn niin a hma a mi nen tunah hian avaiin SHG Saving Bank Account 702 hawn a ni tawh a. Non Performing Assets (NPA) accounts 2319 awmin a hlutna hi cheng nuai 3975.83 a ni. Hemi hun chhung vek hian Thingtlang/Zokhaw mite tana bank hman dan zirtirna Digital Financial Literacy Awareness Programme tum 6 neih niin, hemi hmang hian mi 490 te chu zirtirna pek an ni a. Kum kalmekah Financial Literacy Camp tum 25 neih niin, mi 1132 te hnenah zirtirna pek an ni.

Social Security Scheme hnuaiah bank kaltlanga Cashless transaction pek niin, Pradhan Mantri Suraksha Bima Yojana (PMSBY) hnuaiah mi 651, Pradhan Mantri Jeevan Jyoti Bima Yojana (PMJJBY) hnuaiah mi 492, Atal Pension Yojana (APY) hnuaiah mi 16 ziah luh thar an ni a. Heng bakah hian Bank Security chungchang sawiho anih bakah inkaihhruaina tha zawk awm theih dan turte sawiho niin, Bank tinte pawh chak zawka hma la a, hunbi tiam chhunga data thehlut thin tura chah an ni a. Champhai District thendarh anih tak avangin Financial Inclusion Plan-te enfiah a ni bawk.

Champhai District-ah hian Bank hrang hrang 8 awm mekin, Public Sector Banks 3, Private Sector Bank 3, Regional Rural Bank leh State Cooperative Bank 1 ve ve a awm mek a. Bank branch 13, ATM 11 leh Business Correspondent 4 an awm mek bawk.