Pu C. Lalramzauva, Adviser to Hon’ble Chief Minister chuan thla thara Para-Gliding Accuracy World Cup neihna tur, Serchhip Bawngchawm tlanga Take Off point leh 2020 KTP General Confernce neihna tur Serchhip P&E Venga Pandal sak mek chu vawiin khan a tlawh.

February thlaa Serchhipa neih tur Para-Gliding Accuracy World Cup neihna tur Bawngchawm tlanga Mizoram Aero-Sports Association (MASA) ten ngawrh taka in buatsaihna an kalpui mek chu tlawhin, a hun takah engkim peihfel hman a beisei thu a sawi. He World Cup atan hian NEC atangin cheng nuai 20 an dawn tur thu leh, cheng nuai 16 chu lak fel anih tawh thu a sawi. Khawvel pumhuap infiamna liantham tak Mizoram in a thlen tur hi Chief Minister pawhin a ngaih pawimawh thu sawiin, Mizoram hmel lanna tur anih avangin a tha thei ang bera thlen anih theih nan sawrkar pawhin cheng nuai 50 a tum ve tur thu a sawi bawk. Paragliding take off point Guest House tur sak mek chu en nghalin hnathawktu Champion Infra Tech, New Delhi hnuaia SAHA Company te chu hnathawh zofel thuai tura hmahmawh deuh turin a chah a ni.

Hemi hnu hian February thla tawpa KTP General Conference vawi 58-na neihna tur Leisekawt Field a Pandal sak mek chu tlawhin, Organising Committee ten an lo dawngsawng a, hna thawh kallai mekte a hmunah a enpui. Leisekawt Fleld laihzauh hna thawhkhatna chu duhtawk rih phawt anih tur thu sawiin, zau zawka siam theihna tura hmalak zel dan turte leh leivung paihna te a en nghal bawk ani.

Pu C. Lalramzauva hi Pi Lalthlamuani, EE, PWD Serchhip leh Mizoram Aero-Sports Association (MASA) Sub-Hqrs. Serchhip hruaitute leh thuthar lakhawmtuten an tawiawm a ni.