Vawiin chawhma dar 10 khan Deputy Commissioner Serchhip leh District Child Protection Unit, Serchhip buatsaihin Serchhip Auditorium ah Career Conclave neih a ni.

Hun bul tantu Pi Lalsiampuii, District Child Protection Officer chuan he hun buatsaih anih chhan sawiin, District Level Task Force Committee on Beti Bachao Beti Padhao in hmalakna tur atana ruahmana a lo siam lawk tawh anga zirlai naupangten an hma lam hun atana ruahmanna tha an neih a, eng kawng nge zawh se an tan tha ang tih an thlan thiam theih nana tih anih thu a sawi.

A hun thawh khatna ah hian Dr. Laldinliana, Associate Professor, MZU chuan thusawiin, ngaihtuahna themthiam kan neih a tul a ni, a ti a. Kan zirlaibu leh tunlaia thil thleng mekte a chin chhuaka hre ve tura ngaihtuah peih chuan nakin zelah a hranpa taka inzir leh ngai lovin kan hriatna tipungtu tha tak anih theih thu a sawi a. A theih loh ti mai lovin a theih dan kawng zawn peih a tul a, mi thlir loh dan zawka thlir chin a tul chang pawh awm thin a ni, a ti bawk.

Chawhnu lamah Pu LTL Fela, IIM Lucknow, Chief Manager, Aditya Birla Capital HI-DIGITAL chuan zirlai kalkhawm te chu zirtirna a pe ve thung a, sawrkar hna chauh ni lo eizawnna chi hrang hrang awm theite sawiin, sawrkar hna ringawt ngaihtuah lo tur leh hna tha tak tak tam tak awm thu a sawi. He hunah hian Serchhip khaw chhunga High School leh Higher Secondary School naupangte an tel a ni.