395/2024-2025

Champhai, the 2nd May, 2024: Vawiin chawhma dar 11:00 khan District Level Committee on Myanmar and Bangladesh Refugees, Champhai District chu a tum khat nan an Chairman Pu James Lalrinchhana, District Bawrhsap hovin DC Conference Hall-ah an thukhawm.

Pu James Lalrinchhana chuan Indo-Myanmar ramri dep District pawimawh tak Champhai District chu thenawm ram Myanmar buai avanga raltlan nei tam ber leh buaipui nasa ber district a nih thu a sawi a. Hmalak tawh dante thlirleta hmachhawpte sawiho a tul thu sawiin, raltlan chungchanga hmalakna leh thuthar awm reng rengte chu thawhhona tha tak hnuaia vil tlan a tul a ni, a ti a. Raltlan buaipui kawngah sawrkarin inkaihhruaina a siam anga hmalak a tul thu a sawi bawk.

He hunah hian Member Secretary Dr. Manesia Khaimeichho, SDO (S) Champhaiin March ni 28, 2024 a Sawrkarin a din District Level Committee on Myanmar and Bangladesh Refugees kalphung leh inkaihhruaina siamte a sawifiah hnuah thurel tan nghal a ni.

Thukhawm chuan Village Level Committee on Myanmar Refugees chu Sawrkar thuchhuah zulzuiin Village Level Committee on Myanmar and Bangladesh Refugees ti a thlak remtih a ni a; an dinhmunte zirchiana tuaihnum ni se, a tul dang angin Sub-Committee/Working Group thleng pawha din ni se tih a ni a. A khat tawkin raltlante chhawmdawla buaipuitu Agency-te nen meeting neih thin ni se tih a ni a. Raltlante tana inkaihhruaina siam March ni 31, 2023 a chhuah chu sawiho niin, hriattirna lo tih chhuah tawh chu tha taka kalpui ni se tih a ni a. District Level Committee chuan raltlan buaipuitu leh an tana thahnemngai taka thawktu Agency hrang hrang, NGO, Kohhran leh mimal tlawmngaite hmalakna fakawm a ti a. Hmalakna, tanpuina leh chhawmdawlna dawnte District Level Committee, Village Level Committee, Member leh Agency-te inkarah inhrilhhriat zung zung a tul thu leh lungrual taka hmalakho a tul thu tarlan a ni.

Raltlante chu hriatthiamna avanga awm an nih avangin ram dan leh dun zamte ngaipawimawh fo tur leh dan pela che lo tura beisei an nih thu tarlan a ni a. Raltlan leh khawtual mite inkarah inhriatthiamlohna a awm loh nan leh, inkaihhruaina siamte tha taka zawm a nih theih nan District Level Committee leh Village Level Committee-te tha taka thawhho tlan zel a tul thu tarlan a ni a. Tui, power supply, hriselna leh ei leh bar chungchanga tulte pawh sawiho a ni bawk.

Meeting-a tarlan a nih dan chuan April ni 27, 2024 thleng khan Champhai District chhunga khua 47 ahte raltlan 14,499 an awm tling tawh a; puitling zingah mipa 4,245 leh hmeichhia 4,524 an awm a, heng bakah hian naupang 5,730 an awm bawk a. Relief Camp 23 awm mekin raltlan zinga mi 6,346 te Relief Camp-ah chengin, 8,153 te Relief Camp pawn hmun dangah an cheng thung. Raltlan zawng zawng 14,499 te profiling tih a ni a; mi 9,488 te Temporary ID pek chhuah tawh an ni.

He hunah hian SP Pu Vineet Kumar, Addl. DC Pu K. Zorammuana, Addl. SP Pu Lalmalsawma Hnamte leh member dangte an tel a ni.