394/2024-2025

Kolasib dated 2nd May 2024: Mizoram Information Service 2024 Batch-te chuan ‘District Office Orientation Program’ neiin Kolasibah vawiin khan Extension Training Centre, SIRD & PR, Kolasib an tlawh a. Pu Hmingthanzuala, DIPRO chuan inkawmhona hun hi kaihruaiin Pu ZR Thafala, Principal, ETC leh Pi T.Lalchhanhimi, Faculty-te chuan SIRD & PR hnuai a hmalakna hrang hrang sawi zauna hun an hmanpui a ni.

Pu Hmingthanzuala, DIPRO chuan Mizoram Information Service hnuai a Officer te chuan Department hrang hrang hnathawh dan te, Sawrkar laipui leh State sawrkar hnuai a khawtlang tihhmasawnna tur a Scheme awm te chu an zirchian fo a pawimawh thu a sawi a. Hamthatna hrang hrang awm te chu a dawng tur ten a hun tak a an dawn theih nan Information & Public Relations Department thuchhuak kaltlang a mipui hnen a zirtirna pek thin a pawimawh thu a sawi.

SIRD hnuai a ETC, Kolasib tlawhna hun ah hian kum 2023-24 chhung khan thupui hrang hrang hmangin training tum 14 buatsaih a nih thu te, loneitute tih hmasawnna tura a hmun a zirchianna kalpui thin a nih thu te ngaihthlak a ni a. Sawrkar laipui hnuai a Centrally Sponsored Scheme tha tak a hman a nih theih nan Sawrkar a thawktute leh khawtlang hruaitute hnen ah zirtirna uluk tak a pek thin an nih thu te ngaihthlak a ni. Eizawnna ngelnghet nei tur a thiamthil hmantlak an neih theih nan a mamawhtute hnen ah ‘Skill Development Training’ buatsaih a nih thin thu Pu ZR Thafala chuan tarlangin sawt zawk a hmalakna kalpui a nih theih nan I&PR Department leh SIRD & PR-te chu thawhho a pawimawh thu a sawi bawk a ni.
MIS Officer thar te hian Kolasib district an tlawh zawh hian Lunglei leh Champhai district-ah training hi an nei chhunzawm leh dawn a ni.