472/2022-2023
Champhai, the 3rd February, 2023: District Level Committee on SEDP, Champhai District chu vawiin chawhma dar 11 khan DC Conference Hall-ah an Chairman Pu James Lalrinchhana, District Bawrhsap hovin an thu khawm. He hunah hian chhungkaw tinzawna kalpui Family Oriented SEDP thawhkhatna kalpui dan zirchian anih bakah hmalak zel kawnga tulte relin inrawnkhawmna hun hman a ni.

Bawrhsap Pu James Lalrinchhana chuan Sawrkar flagship programme Socio-Economic Development Policy (SEDP) chu hmalakna pawimawh tak anih thu leh hnathawh dan District huapa ngaihtuahtute chuan chanvo pawimawh tak an neih thu sawiin, hmalak tawh dante, thlen chin leh hmathlirte inpawhtlang taka inhrilhhriat a pawimawh thu leh, thu thlen duhte ngaihtuaha inrawntlan fo a ngaih thu a sawi a. District Level leh Village Level-a SEDP Committee member-te chu SEDP kalpuina tura Sawkarin dan leh inkaihhruaina a duante ngun taka zirchiang thin turin a chah a. Mipuiten an hlawkpuia an chhawr tangkai theih nana enzui a pawimawh thu sawiin, Line department hotute chu bial fanga an kalkualnaah SEDP dawngtute hmalakna endika chik fo tur leh, tanpui an ngaihna zawnahte inhawng taka pui thin turin a chah bawk.

He hunah hian Family Oriented SEDP dawngtuten dan ang taka hma an laka hlawhtlinna an chan theih nan Line Department, Village Level leh District Level SEDP Committee-te inkarah thawhhona tha leh infinchhuahna tha zawk a awm zel theih nana hmalak tulte sawiho a ni a. Family Oriented SEDP thawhkhatna hnuaia first installment pek hnua hmalakna vil zui dan turte, second installment pek hnua endikna report pek dan tur leh hnathawk thate chawimawina pek theih dante an sawiho bawk a. Heng bakah hian District chhunga SEDP Pilot Project chungchangte tarlan niin, District Committee aiawha thuneitu sang zawka thu thlen tur pawimawhte ngaihtuahho a ni bawk.

Champhai District-a Assembly Constituency 3; 23-Champhai North, 24-Champhai South leh 25-East Tuipui Assembly Constituency-ah te Village Level Committee on SEDP 68 din a ni a. Family Oriented SEDP thawhkhatna kaltlangin Assembly Constituency tin atangin hamthatna dawngtu beneficiary 1,500 thlan chhuah niin, an vaiin beneficiary 4,500 an awm a ni. Meeting-a tarlan anih danin Line Department hrang hrangte chuan Family Oriented SEDP thawhkhatna hnuaiah hian beneficiary tin tan first installment Rs 25,000/- an pe chhuak tawh a ni.

District Level Committee on SEDP thutkhawma tarlan anih dan chuan Family Oriented SEDP thawhkhatna first installment kaltlangin UD&PA Department hnuaia trade 2 a beneficiary 42 te hnenah tanpuina Rs 10,50,000 (cheng nuai sawm leh singnga); Agriculture Department hnuaia trade 3 a beneficiary 843 te hnenah tanpuina Rs 2,10,75,000 (vaibelchhe hnih nuai sawm singsarih leh sangnga); Animal Husbandry & Veterinary Department hnuaia trade 5 a beneficiary 2,277 te hnenah tanpuina Rs 5,69,25,000 (cheng vaibelchhe nga nuai sawmruk pakua singhnih leh sangnga); Horticulture Department hnuaia trade 20 a beneficiary 304 te hnenah tanpuina Rs 76,00,000 (cheng nuai sawmsarih leh paruk); Sericulture Department hnuaia trade 1 a beneficiary 19 te hnenah tanpuina Rs 4,75,000 (cheng nuai li singsarih leh sangnga); Fisheries Department hnuaia trade 1 a beneficiary 280 te hnenah tanpuina Rs 70,00,000 (cheng nuai sawmsarih); Commerce & Industries Department hnuaia trade 23 a beneficiary 730 te hnenah tanpuina Rs 1,82,50,000 (cheng vaibelchhe khat nuai sawmriat pahnih leh singnga) leh Land Resources, Soil & Water Conservation Department hnuaia trade 2 a beneficiary 5 te hnenah tanpuina Rs 1,25,000 (cheng nuai khat singhnih leh sangnga) te sem chhuah a ni.

He hunah hian Pu H.Lalhruaitluanga, SDO Sadar & Nodal Officer, SEDP Champhai District leh District Level Committee on SEDP, Champhai District member-te an tel a ni.