3473/2022-2023
Aizawl, the 3rd February, 2023: Vawiin khan Commerce & Industries Minister Dr R Lalthangliana hovin Secretariat Conference Hall, MINECO ah meeting neih a ni a. Directorate General of Hydrocarbons (DGH), ONGC, Oil India Ltd, NHIDCL leh Mizoram PWD bakah Mizoram sawrkar atangin Commerce and Industries leh Geology & Mining hotute an tel a ni.

Minister chuan meeting neih chhan sawi fiahin Mizoramah hun engemaw chen atanga tan tawh oil leh gas zawn hna chu chak lehzual zawka thawh a nih theih nan, a mawhphurhtu agency hrang hrang te kohkhawm an ni, a ti a. Thawhhona tha tak an neih theih nan leh oil leh gas zawn hna tibahlah thei thil hrang hrang te sawiho a, a chinfel dan ngaihtuah a, zalen taka inrawnkhawmna neih tul a tih vanga meeting koh a nih thu Dr R Lalthangliana chuan a sawi.

Kum 20 kalta vel atang khan Mizoramah Oil leh Gas zawn hna hi tan a ni tawh a. ONGC leh Mizoram Sawrkar chuan September 2003 khan a vawikhatna atan inremna thuthlung an ziak a. Kolasib, Mamit leh Aizawl district hmun thenkhata hma la turin thuthlung hi an ziak a ni. Meidum leh Zanlawnah exploratory well laih a ni a. Meidumah hian hydrocarbon hmuh a ni a, amaherawhchu suma chantir turin duhthusamin a tha tawk lo. Zanlawnah erawh beisei ang hmuh a nih tak loh avangin ONGC hian an hna hi 2020 atangin an chawlhsan rih a ni. Hortoki ah exploratory well dang verh leh tum a ni a, Directorate General of Hydrocarbons (DGH) atangin phalna nghah mek a ni.

Oil India leh Mizoram Sawrkar chuan kum 2007 ah thawhhona ziakin Serchhip, Hnahthial leh Aizawl huam chhung hmun thenkhatah hma an la a. Maubuang, Keifang, Thenzawl leh Phulmawi ah te hmun 4-ah lei an verh tawh a, Pangzawl-Thiltlang inkarah verh leh tum niin heta tan hian DGH phalna an la tawh a, kum 2022 February thla atanga January 2024 thlengin phalna pek an ni.

Oil exploration atan hian bungraw ritsak leh liantham tak tak thiar luh a ngaih thin avangin inkalpawhna kawng tha mamawh a ni a. Mioram PWD in Bailey Bridge an dawh lai mek chu chak zawka dawh zawh ni se an ti a. NHIDCL in kawngpui siam hna a thawh mek pawh leiverhna tur hmun panna kawngpui te chu siam zawh thuai a nih theih nan, ngaih pawimawh bikah lo nei se tia hriattir an ni.

Assam – Manipur – Mizoram state pathumte intawhkhawmna ramri 255sq km bial vela zauah ONGC in oil leh gas zawn hna a thawk mek bawk a. Mizoram lamah hian an beisei ang te an hmuh mai theih loh avangin hna chawlhsan rih a ni a. Hmalak chhunzawm an tum dan te meeting ah hian zawh fiah an ni a. Mizoram leilung chu state thenawm te aia muk zawk leh laih har zawk a nih avangin hun a duh rei tih tarlan a ni a. Oil leh gas zawn hna hi hun engemawchen an thawh hnuah pawh tun thlengin beisei ang hmuh la ni lo mahse data tam tak an lakkhawm theih phah a. Hei hian an zirchian zelna turah a pui dawn a. Oil India Ltd leh ONGC te hian an data in hrilh hre tawnin a hu hoa zirchian leh zualna joint study kalpui an tum tih meeting ah hian sawi lan a ni bawk.