3474/2022-2023
Aizawl the 3rd February 2023 : Nimin khan Sericulture changtu Minister Er. Lalrinawma Minister chuan Sericulture Directorate Office leh Training Institute a tlawh.

Er. Lalrinawma chuan Sericulture Department a thawktu zawng zawng ten thahnemngai taka ram hmasawnna atana hna an lo thawk thin leh hmalakna hrang hrang theihtawp chhuaha an lo kalpui thin chu a fak a. Rilru leh ngaihtuahna thar nen theihtawp chhuah a thawk zel turin a fuih a ni.

“Eng hna pawh thawk ila tih tak takna nun nen theihtawp chhuaha, neitu rilru kan put chuan hlawhtlinna hmel hmuh tur a awm zel dawn a ni” Minister chuan a ti a. Tunlai incheina sang zelah thangtharte mamawh phuhru thei turin silk dehchhuahna kawngah theihtawp chhuah a tul thu leh Mizoram Silk hmanga thil siam chu khawvel huap pawha zahpui awm lo leh tun aia ram mipuite pawhin kan ngaihhlut zel a beisei thu te bakah hna thawktute te pawh an thiamna midang zirtir ve zel turin Minister Er.Lalrinawma chuan a chah a ni.

Minister hi Sericulture Director  Pu V. Zothansanga leh a thawhpui ten lo dawngsawngin Directorate- a section hrang hrang bakah Aizawl District Sericulture office leh Sericulture Training Institute Zemabawk a Cocoon storage Room, Reeling factory, Dyeing Unit, Twisting Unit leh Bawngkawna Department Showroom-te a tlawh nghal bawk a. Thawktute nen inkhawm hona neiin hmasawn zel dan tur kawng hrang hrang an sawi ho a ni.