2111/2022-2023

Champhai, the 29th September, 2022: District Level Narco Coordination Centre (NCORD) Committee, Champhai District thutkhawm vawihnihna chu vawiin chawhma dar 11:00 khan an Chairperson Pu James Lalrinchhana, District Bawrhsap hovin SP Office-ah neih a ni.

Chairman Pu James Lalrinchhana chuan Champhai District-ah ruihhlo do kawnga official leh YMA te inkara thawhhona tha tak a awm thin chu fakawm a tih thu sawiin, Mizoram mai nilo India ram laili thlenga ruihhlo tawlh thlakin bu a khuar theih avangin ramri depa awm Champhai District atang hian theihtawp chhuaha hmalak a tul a ni, a ti a. Champhai District-in engtin nge hma a lak tih leh ruihhlo do kawnga tanrualna chu mite thlir leh ngaihchan a nih avangin inthlahdah lo leh inenfiah chung zela kal angaih thu a sawi bawk a. District Level Narco Coordination Centre chu ruihhlo do kawnga inrawnkhawmna leh thawhhona tha zawk awm theih nana din a ni, a ti a. Official program bakah puipunna hmunahte uar lehzuala ruihhlo leh a kaihhnawih chungchang inzirtirna tam zawk neih a tul thu a sawi bawk.

Convener Pu Lalrinpuia Varte, SP Champhai chuan ruihhlo tawlh leh hmansual chu ram tana hlauhawm a ni tih hriain Sawrkar laipuiin NCORD chu kum 2016 ah a din tih sawiin, kum 2019 ah siam that niin tunhnaiah chak lehzuala kalpui a ni, a ti a. Kumin May ni 10 ah District Level NCORD Committee member-te State Sawrkarin a siam fel thu leh hmalaknate Narcotics Control Bureau lamah online hmanga report zel a nih thu a sawi bawk.

He hunah hian Champhai District Police leh Excise & Narcotics Department Champhaite hmalakna kaltlanga kumin chhunga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpui Addl. SP Pu C.Lalengliana leh Asst. Commissioner of Excise & Narcotics Pu Vanlalvura Ralte te hnen atangin ngaihthlak a ni.

He huna tarlan a nih dan chuan January ni 1, 2022 atanga vawiin September ni 29, 2022 thlengin Champhai District Police-ten ND&PS Act, 1985 hnuaiah case 65 an ziaklut a, mi 83 man niin heng zinga 23 te hi ramdang mi an ni. Heroin gram 9694 (kg 9.7) man niin, tualchhung market-a a hlut zawng cheng nuai 223.80 a ni a. Methamphetamine mum 8,18,500 (kg 84.05), a hlut zawng cheng nuai 1637 man hu bakah Pseudoephedrine mum 1,80,000 (kg 28.80), cheng nuai 126 hu an man bawk. Ruihhlo man zawng zawng hlut zawng hi cheng nuai 1986.80 vel a ni.

Excise & Narcotics Department Champhai ten ND&PS Act, 1985 hnuaiah case 49 ziaklutin mi 49 an man a. Heroin kg 7.765, tualchhung rate-a cheng nuai 93.18 man, Methamphetamine mum 1,50,700, cheng nuai 452.1 man, Ganja kg 3.2, cheng 3,840 man leh Alprazolam mum 218, cheng 2,180 hu an man bawk a. An man zawng zawng hlut zawng hi cheng nuai 545.34 vel a ni.

Vawiin District Level NCORD Committee meeting-ah hian NCORD thutkhawm hmasa ber June ni 13, 2022 a thurel bawhzui a nih dante ngaihthlak a ni a. Meeting hmasa thurel bawhzuiin Excise & Narcotics, Police leh CMO Drugs Control Cell-te kaltlangin Anti Drugs Awareness Campaign tum 15, Signature Campaign tum 1 bakah SYMA leh Nasha Mukh Bharat Abhiyan kaltlangin inzirtirna tum engemawzah neih a ni a. Ruihhlo tawlhruk phurhna lirthei man a nihin, driver emaw, lirthei neitute an inhnamhnawih ngei tih finfiah a nih chuan ND&PS Act hnuaiah chhuhsaka tihral theih a nih thu tarlan a ni a. Ruihhlo tawlh leh zuar mante dan ang taka an phu tawk hremna pek zel an nih theih nan leh pawikhawih nawn awm leh thinte ven kawnga tanlak ngaite ngaihtuahho a ni a. Thenawm ram buai avanga ruihhlo tawlh tunhma zawng aia a tam zual thu pawh he hunah hian tarlan niin, ruihhlo do leh man kawnga Force lam leh YMA te thawhrimna chhuanawm an ti a, tha thlah lova tanrual zel a tul thu tarlan a ni bawk.

Ruihhlo leh dan lova thil tih do kawngah district dangte nen inpawhtlang leh thawhhona tha tak neia hmalak a tul thu leh awmze nei zawka infinchhuah tawn zel a tul thu pawh sawiho a ni a. District Education Committee kaltlanga zirna in tlawh leh Forest Department hnuaia Wildlife Week hman turah hetiang lam hawia inzirtirna pek tel tha tih a ni a. District Level NCORD Committee member ten ruihhlo do nana tanrual entirnan joint operation remchang hmasa berah neih nise tih a ni a. Heng bakah hian ruihhlo tawlh hluar chho zel ven leh do kawnga pawimawhte sawiho a ni bawk.

Attachment

  • Loading attachment...