2112/2022-2023
Aizawl, 29th September, 2022 : Vawiin atang khan Assembly Annex Conference Hall-ah National Vector Borne Disease Control Programme (NVBDCP), leh State 10 Health & Family Welfare Department te chuan ni 3 (29th September, 2022 – 1st October, 2022) chhung awh tur Regional Review Meeting (RRM) an nei a, he ni thum chhung awh tur Regional Review Meeting hi Health Minister Dr R. Lalthangliana chuan khuallian niin a hawng.

Regional Review Meeting (RRM) hi kum tin thla thum danah (Quarterly) a neih thin niin, Global Fund for AIDS, Tuberculosis, Malaria (GFATM) Projected States a tel heng North-East State pasarih (7) (Assam, Meghalaya, Tripura, Nagaland, Arunachal Pradesh, Manipur, Mizoram) leh Jharkhand, Odisha leh Chhattisgarh ah te hian huaihawt thin niin State 10 atanga Vector Borne Disease Control Programme a Programme Officers, Regional Directors, Consultants bakah Govt of India atanga mithiamten he hun hi an chhim thin a, State hrang hrang atanga VBD lama thawktu mi 80 vel he hunah hian an rawn tel a ni. He meeting ah hian India ram a Malaria natna umbo anih theihnan a hmasawnna tur zir hona hun neih a nih thin bakah Malaria tihremna kawnga Programme hmalakna leh activity te thlir ho thin a ni.

Regional Review Meeting hawnna inkhawmah hian khuallian Dr R. Lalthangliana chuan thu sawiin, State hrang hrang atanga palai rawn kalte chu a lo lawm a, review meeting hian malaria umbo kawngah awmze thui tak a neih a beisei thu a sawi a ni. Mizoram chu India ramah mihring awm cheng zat atanga the a malaria vei hmuhchhuah tamna ber a nih thu sawiin, hei hian hmabak kan la ngah zia leh tan lak nasat a tul zia a tarlang chiang hle a, review meeting a State dang atanga rawn tel mithiam tak takte chuan hei hi vei puia, hmalak dan kawng tha zawk ngaihtuah chhuahpui tura an ngaihtuahnate seng turin a sawm a ni.
Mizoram dinhmun tarlangin Dr R. Lalthangliana chuan Health department in district 9 a Mizoram an then zinga 4 - Lunglei, Lawngtlai, Siaha leh Mamit chu tehfungah pawh a sang ber Category 3: Intensified Control Phase (High Endemic District) ah an awm a, a bak district dang zawng erawh chu Category 1: Elimination Phase (Low Endemic District), malaria umbo thei dinhmuna ding an ni tawh tih a sawi a. Mizorama malaria vei zinga 80% chu a chunga tarlan district 4 ami an ni tih sawiin NGO, sakhua/kohhran hrang hrangte, zirna in hrang hrangte leh Village Council te nen thapui thawha kan tanrual a tul hle a ni, a ti.

Kumin kum kal lai mek January 2022 atanga August 2022 thlengin Mizoramah malaria vei 7672 hmuhchhuah a nih thu leh nunna chan mi 5 an awm laiin, nikum 2021 January atanga Dedcember thla chhung khan malaria vei 5637 hmuhchhuah an nih thu leh nunna chan mi 10 an awm tih khuallian chuan a sawi a, nikum aiin kumin thla 8 chhung leka malaria vei hmuhchhuah an tam hian sawrkar pawh nasa lehzualin tan a lak tir a, sawrkar laipui pawhin theihtawp chhuah puiin Anti-Malarial Drugs leh Rapid Diagnostic Kits bakah mithiamte rawn tirin kawng tinrengin hma min lakpui a, kan lawm em em bakah nakumah chuan hma kan sawn ngei kan beisei bawk a ni, a ti.

Tun dinhmunah Mizoram hi India rama Malaria tamna ber state ni mekin, District 9 atang District 4 heng Lunglei, Lawngtlai, Mamit leh Siaha te hi Malaria tamna district an ni. Kumin Jan – Aug thla chhung hian Mizoramah Malaria vei mi 7672 hmuhchhuah tawh niin, Malaria vanga nunna chan mi 5 lai an awm tawh bawk. Nikum kum 2021 Jan – Dec chhungin Malaria natna hmuhchhuah zawng zawng mi 5637 niin, nunna chan mi 10 an awm bawk. Nikum chhung zawnga Malaria natna hmuhchhuah zawng zawng aia tam kumin thla 8 chhung hian hmuhchhuah tawh niin Health & Family Welfare Dept chuan Mizorama thosi in natna a thlen theih hrang hrang laka invenna lama hmalakna a kalpui mek zel ani.

India sorkar in kum 2030 a India ram Malaria natna awm tawhlohna rama siam a tum mek ang hian Mizoram sorkar pawn State dangte rualin ke a pen zel a. Sorkar hmalakna chi hrang hrang heng Indoor Residual Spray (IRS), daily usage of ITN/LLIN te, vector control measures bakah personal protection lam a mipui zirtirna IEC/BCC lamah tan ala nasa hle a ni. Tin, NHM/Health Department hmalakna in Intersectoral Convergence atan Mizoram sorkar dept hrang hrang te nen thawhho na kawngah hma a la mek zel bawk.

KUM 2017 – 2022 INKARA MIZORAM MALARIA DINHMUN
YEAR MONTH TOT. BLOOD EXM ABER MALARIA CASE API PF PV DEATH
2017 Jan-Dec 213601 17.89 5715 4.79 4974 741 4
2018 Jan-Dec 218178 18.16 4296 3.58 3937 359 3
2019 Jan-Dec 233236 19.03 8543 6.98 8010 533 8
2020 Jan-Dec 277834 22.95 8349 6.90 6811 1530 6
2021 Jan-Dec 280693 22.71 5637 4.56 4564 1073 10
2022 Jan-Aug 209601 - 7672 - 5668 2004 5

ABER – Annual Blood Examination Rate (Kum khat chhunga mihring awm za zela thisen exam zat)
API – Annual Parasite Incidence (Kum khat chhunga mi 1000 zela Malaria vei zat)

Regional Review Meeting hawnna inkhawm hi Pi Esther Lalruatkimi, Principal Secretary, H&FW in a kaihruai a, Ministry of Health & Family Welfare, New Delhi, Govt of India atangin Dr. Tanu Jain, Director, H&FW bakah Central lama hotuten an rawn tel pui bawk. Dr. Eric Zomawia, Mission Director, National Health Mission chuan lawmthu sawina in he hun hi a khar a ni.