2113/2022-2023
Champhai, the 29th September, 2022: Khawvel hmun dangte rualin vawiin khan Champhaiah National Programme for Prevention & Control of Cancer, Diabetes, Cardio-vascular Diseases and Stroke (NPCDCS) buatsaihin ‘World Heart Day’ puala hun hman a ni. He hunah hian 'Use heart for every heart' tih chu thupui atan hman a ni.

World Heart Day puala District Hospital, Champhaia hun hman hi Dr.Zatluanga, District Medical Superintendent, District Hospital Champhai chuan a kaihruai a. Hriselna lam ngaihthah, taksa sawizawi uar loh leh ei-in kawnga insum tawk loh avangin cancer, heart attack leh stroke-te a tam phah thu sawiin, natna hriatchhuah hma hi kan taksa tan a pawimawh a ni, a ti a. Faina chungchang pawh sawiin, hospital chu mipuite ta a nih ang ngeiin a tlawhtu apiang ten kan vawng thinghlim reng tur a ni, a ti bawk.

He hunah hian Dr. PC Lalawmpuia, MD, District Hospital Champhai chuan World Heart Day thupui 'Use heart for every heart' chungchang bakah Lung chungchanga hriattur pawimawh hrang hrangte a sawifiah a. Natna inkaichhawn theih loh Non Communicable Diseases (NCD), cancer, heart attack, stroke leh zunthlumte hi natna hlauhawm tak tak ni mahse nunphung thlak danglam chuan ven theih a ni tih hriat a pawimawh a; dam loh hnua exercise lak te, ei leh in hrisel ei te, meizuk loh te ngaipawimawh thar lovin, a hma atanga kan inven lawk a pawimawh a ni, a ti. Ram leh hnam hrisel ni tur chuan chhungkua atangin bultan a ngai a; mipuite an hrisel zawk theih nan ke-a kal tam te, upa deuh ke-a kal duh tan pawh chawlh hahdam lawkna tur hmun siamte ngaih pawimawh thar a tul thu a sawi bawk.

World Heart Day puala hun hman hi Dr. RE Lalremruata, DPO, NPCDCS, Champhai chuan lawmthu sawiin hun a khar a ni.

Kum 1946-a din World Heart Federation chuan khawvel ram zawng zawnga mihring chengte hnenah Non Communicable Diseases (cancer, heart attack, etc) chungchang zau taka inzirtir a nih theih nan kum 2000 atang khan kum tin September ni 29-ah ‘World Heart Day’ a hmang thin a. NCD te hi natna inkaichhawn theih loh ni mahse mi nunna suattu lian ber an ni tawh a ni.