2114/2022-2023
Champhai, the 29th September, 2022: Vawiin chawhma dar 11:00 khan Kahrawt Community Hall, Champhaiah Labour, Employment, Skill Development & Entrepreneurship (LESDE) Department chuan Central YMA (CYMA) leh Common Service Centre (CSC) te nena tangkawpin, Pradhan Mantri Shram Yogi Maan-Dhan (PM-SYM), National Pension Scheme (NPS-Traders) leh e-SHRAM Portal chungchang mipuiten an hriatchian theihna turin inzirtirna leh puanzarna hun an buatsaih.

He hunah hian Dr. J.T. Vanlalngheta, Joint Labour Commissioner, LESDE Department leh Pu JM Soren, Lead District Manager, Lead Bank Champhai ten heng scheme chungchanga hriattur pawimawhte an sawifiah a. Pu Lalbiakmuana Hauhnar, Employment Officer, LESDE Department chuan powerpoint presentation pein scheme-in a tum leh hriatchian ngaite a sawifiah a. Zawhna leh chhanna hun hman a ni bawk.

He hun hi Pu T. Vanlalruata chuan kaihruaiin Central Welfare Scheme zirhonaah hian Pu C.Vanlalremruata, Staff, Employment Exchange Champhai chuan kalkhawmte lawmna thu a sawi a. Pu Roneihthanga, Central YMA Finance Secretary leh Pu F. Lalrinmuana, President, Sub-Hqrs. YMA Champhai ten thu an sawi bakah Pi Helen Zochhingpuii, Labour Officer, LESDE Department chuan lawmthu sawiin hun a khar a ni.

PM-SYM& NPS Traders leh e-Shram Portal hi Sorkar laipui hnuaia Ministry of Labour & Employment hmalakna a ni a, hei hian a tum ber chu mahni kutkawiha eizawnna hna thawktute dinhmun chawikan leh hlawk zawka hna an thawh theih nan te, vanduaina leh chhiatna an tawh palh pawha hamthatna an dawn theihna tur leh hnathawktu a lo upat huna thla tin pension pek dan tur chungchangte a ni a. Hamthatna dawng thei tur hian veng leh khaw tina Common Service Centre (CSC) ah inziahluha ngaihven theih a ni bawk.

He hunah hian Champhai khawpui chhunga Branch YMA tin aiawh leh Common Service Centre (CSC) aiawhte an tel a ni.