2115/2022-2023
Khawzawl, the 29th September, 2022: District Election Office, Khawzawl leh Electoral Literacy Club (ELC), Govt. Khawzawl College-te tangkawp chuan vawiin khan election chungchang inhrilhhriatna atan Systematic Voters' Education and Electoral Participation (SVEEP) Quiz Competition, Govt. Khawzawl College Multipurpose Hall-ah an buatsaih. A hawnna programme chawhma dar 10 a neih hi District Election Officer (DEO) Pu C.C Lalchhuangkim, District Bawrhsap ni bawk chuan khuallian niin a hmanpui a ni.

Hawnna hun Pu Vanlalchhuanawma, President, ELC, Govt. Khawzawl College kaihhruaiah District Election Officer Pu C.C. Lalchhuangkima chuan thu sawiin, election chungchang inzirtirna atana quiz competition buatsaih a ni chu lawmawm a tih thu a sawi a. Election pawimawh zia sawiin, Zirlaite chu a thehdarh kawngahte tan la zel turin a fuih a. Inthlannaah vote nei tawhte chu vote thlak theuh turin a ngen a ni.

Election Officer Pu James Lalnithanga chuan election chungchanga hriattur pawimawhte a sawi a. He hunah hian Pu. K.Lalkulhpuia, Nodal Officer, Electoral Literacy Club, Govt. Khawzawl College chuan inhmelhriattirna leh quiz kalpui dan turte a sawifiah a. Pu K. Ziona, Principal-in kalkhawmte lawmna thu a sawi a, Lalchhanhimi, Secretary, ELC chuan lawmthu sawina hun a hmang bawk.

SVEEP Quiz Competition hi Quiz Master, Ms PC Lalhmingtluangi kaihhruaina hnuaiah neih a ni a. Department tinte chu group-a inthenin intihsiakna kalpui a ni a. Department tin ten participant 2 theuh an nei a. 1st round ah hian Department 6 te an inel a, mark hmu sang 3 ten final an lut a. Result kimchang chu hetiang hi a ni:

1st Prize - History Department (Lalawmpuia & Lalhmingmawia) - Certificate leh Rs. 5,000

2nd Prize - Political Science Department (Lalhruaizela & Janet Lallianzuali) - Certificate leh Rs. 3,000

3rd Prize - Economics Department (Lalremruati & Lalnunringi) - Certificate leh Rs. 2,000
Heng bakah hian Mizo Department, English Department leh Education Department-te chu Certificate leh Rs. 500 (Consolation Prize) hlan an ni bawk.