2116/2022-2023

Aizawl, the 29^th September 2022 : Ministry of Development of North Eastern Region (MDONER) Parliamentary  Consultative Committee vawiina New Delhi-a ṭhutkhawmnaah Mizoram MP (LS) Pu C Lalrosanga chuan Mizoram khawchhak lam leh chhim lamah thlawhtheihna ṭumhmun siamna tur hma la turin Sawrkar Laipui a ngen a. Hmarchhak biala ramchhung leh rampawn zin mi tam zawk hip luhna tur leh enkawlna ṭha zawk siamsak chungchanga DONER Minister Pu G Kishan Reddy hova MP te leh Ministry hrang hrang aiawhte ṭhutkhawmnaah Pu C Lalrosanga chuan Mizoramin thlawhna ṭumhmun pakhat chauh a neih hi a tawk lo a,  tourism leh kawng danga hmasawnnan Mizoram  khawchhak leh chhim lama thlawhna ṭumhmun neih ngei a ṭul a ni tiin a sawi a. Hemi kawnga hmathar la chak turin Civil Aviation Ministry thuneitute a nawr a ni.                             

Pu C. Lalrosanga chuan Mizoram chhim lam thlenga relkawng phah turin Railways hotute a ngen bawk a, hemi kawnga hma lo lak tawhte tharthawh leh turin Railway Board aiawhte a ngen bawk. Mizoram chhim leh khawchhak lamahte zinmite tlawh duh tur hmun hrang hrang a awm a ni tih sawiin thlawhna, rel leh lirtheia tlawh tur hmun hlui leh mawi tak tak tlawhpawh leh tihchangtlun turte te a awm a ni a ti.  Lawngtlai district a Kolodyne Luidungah lunghmun mawi leh hmuhnawm tak takte zinmite tana tlawhpawh leh en theiha siam a nih theih dan turte sawiin MP chuan hmalakpuiah DONER Minstry hotute a sawm a. Mizoram khawchhak lama pipute sulhnu humhalh chunga zinmite tana tlawhpawh theihna tur ruahmanna siam a rawt bawk a ni.

Vawiina DONER Ministry Parliamentary Consultative Committee ṭhutkhawmnaah hian DONER Minister of State Pu B L Verma, Hmarchhak MP-te,  DONER Secretary, NEC Secretary leh Ministry hrang hrang aiawhte an tel a ni.