2117/2022-2023
Aizawl, the 29th September 2022: Vawiin chawhma khan Governor Hari Babu Kambhampati leh Lady Governor Jayasree Kambhampati te chuan ni 2 chhung Serchhip District a official programme hmang turin Serchhip khawpui an thleng a. Deputy Commissioner Office tlawh hmasa berin hetah hian District a Sawrkar hotulute a kawm nghal a. Hemi hnu hian Kohhran hruaitute, NGO hrang hrang hruaitute, Political Party hotute leh MJA Serchhip member te nen a hran theuhin an inkawm chhunzawm leh bawk a ni.

Bawrhsap Pi Nazuk Kumar in Serchhip District mipuite aiawh hian Governor te nupa lo lawmna thu a sawiin District hmelhmang sawilanna hun a hmang a. Serchhip SP Pu Stephen Lalrinawma'n District chhunga Dan leh Thupek kenkawh dan sawina hun a nei bawk. District hotulu pahnih ten report an peklai hian Governor Hari Babu Kambhampati hnen atanga zawhna te District Office a hotu ber te leh Bank lama hotuten an chhang a ni.

Governor chuan project thenkhatte thawh chhung a rei lutuk thin leh a thawh hun chhung pawhsei a ni fo thin chu thil fel lo tak a ni a ti a. Project thenkhat thawhchhung rei lutuk hian project thar thawh tur awm thei te a dang bet thin a, mipui tana hmasawnna ruhrel tha tak tak tur te kan chan phah thei a ni a ti. Mizoram hmun hrang hranga District mipui tam zawk ten Central Welfare Scheme tha tak tak, cheng tlem te kum khat atana pek a, cheng nuai tel hmuh theihna tur te an hre lo hle tih a hmu a; pawi a tih thu leh hengah te hian zirtirna kalpui nasat sual sauh a tul thu a sawi a ni. Banker te hian scheme tha tak tak beneficiary te hrilhhriat hi an mawhphurhna a ni a ti. "Vanduaina emaw chhiat tawh thulh a Rs 2,00,000/- vel lak theih na Rs 15 kum tina Bank a deposit duh mi tam tak an awm ka ring a, mi tam tak chuan an hriat loh vangin heng scheme te hi an ti lo a ni", a ti.

PM Ujjwala Yojana(PMUY) scheme kal meka Gas connection neih theih chungchang te hria an tlem bakah diltu an tlem chu mipuiin an hmelhriat that tawk loh vang a ni a. Hengah te hian Gas Distributor te leh sawrkar official te an tan a ngai hle a ni a ti. Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana(PMJJBY), etc,. te mipuiin an hriat a ngai a ni a ti.

Education-ah Serchhip District leh district dang pahnih tan lak zual a ngai a; Mizoram pum ang pawhin tan lak a ngai hle a. PGI rating-ah Mizoram dinhmun siam that a nih theih nan DEO ten Headmaster te leh school head te zirtirna an pe tha hle tur a ni a ti. Sawrkar hnathawk te, banker te, gas distributor leh mipui rawngbawlnaa mawhphurtute chu pro-active an ni tur a ni a, zawh kher ngai lovin mipui tana hamthatna an kuta awm te chu an lo hrilh zung zung zel tur a ni a, hei hi an mawhphurhna a ni a ti.

Governor chuan Serchhip District chu District ralmuang ber nia a hriat thu a sawi a. Kawng thenkhatah hmalakna tha tak tak te hmuh tur awmin National Award for Best Panchayat te pawh Sialsirin a lo dawng tawh a. Heng bakah hian Faina kawngah Serchhip District in hma an la tha hle nia a hriat thu a sawi a ni.

Pi Nazuk Kumar, Serchhip Bawrhsap report pek dan chuan tunah hian Serchhip District 1421.6 sq.Km a zauah hian mihring 80,000 vel an cheng mek a. Village Council 54 a awm a, Civil Sub Division 3, RD Block 2 a awm a, Assembly Constituency 3 a awm bawk a ni. Serchhip Bawrhsap hian Serchhip District chhunga hmalakna lian NH-54 siam hna te, Myanmar Refugee chungchang te, Jaal Jeevan Mission leh a dang te a report ah a tarlang a. Serchhip district chhunga hmalakna hriat hlawh bik - Furniture leh bungbel siam hna, Baktawng, Puantah lama eizawnna, Thenzawl, N.Vanlaiphai lama Theitui siamna, Serchhipa zikhlum leh thlai dang tharchhuah chungchang te a sawi bawk a ni.

Serchhip SP Pu Stephen Lalrinawma hnen atangin Security Scenario of Serchhip District report ngaihthlak a ni leh a. Police, Excise leh mipuite thawhhona tha tak avangin Serchhip District ah buaina lian tham thleng a awm lova. Dan phal loh tawlhruk man erawh a awm zeuh thin a. Heng te hi report ah tarlan a ni. Tunah hian Serchhip District Police -ah hian Police personnel 153 awm tur an nih laiin 110 chiah an awm mek a ni.

DC Office, Serchhip a Governor Hari Babu Kambhampati leh Sawrkar hnathawkte inkawmna hun hi Pu K.Saitluanga, DIPRO Serchhip in a kaihruai a. Pu Lalmuansanga Ralte, Addl DC chuan lawmthu sawiin hun tawp a khar thung a ni.