3565/2024-2025

Champhai, 28th November 2024: Champhai District Level Narco Coordination Centre (NCORD) Committee chu vawiin chawhnu dar 1:00 khan Addl DC Pu K. Zorammuana kaihhruaiin an ṭhukhawm.

Ṭhutkhawm kaihruaitu Pu K Zorammuana chuan ṭhutkhawm chhan sawi hawngin, kalkhawmte inhmelhriattirna a nei a. Champhai District chhunga ruihhlo dona kawngah, sawrkar thuneitute leh YMA te inkara thawhhona tha tak a awm thin chu fakawm a tih thu a sawi a.

Champhai District chu ramri depa awm a nih angin ṭhalaite nun suat mektu ruihhlo dan chah kawngah theihtawp chhuah a ngaih thu pawh sawiin, ruihhlo dona kawngah inthlahdah mai lo a, tha thlah lo a infinchhuah zel turin kalkhawmte chu a sawm a ni.

Champhai Addl SP Pu PC Lalṭanpuia chuan meeting agenda sawifiahna neiin ruihhlo tawlh leh hman sualna a pung nasa hle a ni, a ti a. Mizoram mai ni lo, India ram hmun hrang hrangah pawh ruihhlo tawlh rukin bu a khuar nasa hle tih sawiin, a dona kawngah theihtawp chhuah a ṭul hle a ni, a ti a. District NCORD member te chu ruihhlo dona kawngah theihtawp chhuah awmze nei zawk leh mumal zawka khuahkhirh anih theihna tura ngaihtuahna seng zel turin a chah a ni.

He hunah hian Champhai District Police,Excise & Narcotics Champhai, SYMA leh line Department hrang hrang ten ruihhlo do kawnga hma an lakna te ngaihthlak a ni a. He huna tarlan a nih danin November, 2024 chungin Champhai District Police-ten ND&PS Act, 1985 hnuaiah case 10 an ziaklut a, mi 18 man an ni. Heroin gram 928 man a ni a, tualchhung market-a a hlut zawng cheng nuai 27.84 a ni a. Methamphetamine kg 47.881, a hlut zawng cheng nuai 622 (₹ 6,22,45,300) man hu an man a. November ni 25 leh ni 26 khan Khuangphah leh Lungphunlian khua Ganja chinna hmun a mi Ganja kung 21, cheng sing 5 man hu chu Hnahlan Police Beat Post Duty te hmalaknain tihchhiat a ni bawk.

He mi hun chhung vek hian Excise & Narcotics Department Champhai te chuan ND&PS Act, 1985 hnuaiah case 7 ziak lutin mi 10 an man a. Heroin gram 714.89 tualchhung rate-a cheng nuai 21.44 man hu an man bawk a ni.

Vawiina NCORD meeting-ah hian December thla chhunga hmalak dan tur sawiho nghal niin, District Education Department buatsaih High School Zonal Sport lo awm turah zirlai te chu ruihhhlo tawlh leh hmansual laka fihlim tura intiamna nei tir  ni se tiin a rel a. District Level NCORD Committee member ten ruihhlo do nana  Joint Operation remchang hmasa berah neih ni se tih a ni a. Heng bakah hian ruihhlo tawlh hluar chho zel ven leh do kawnga pawimawhte sawiho niin krismas leh kumthar vuakvet a hmalak dan tur leh tlawmngai pawl hrang hrang te thawh puidan tur sawiho a ni bawk.