3566/2024-2025

Saitual, the 28th November, 2024: Vawiin khan Greater Saitual Water Supply Scheme (Pumping) Saitual khawpui chawmtu chu PHED Engineer-in-Chief, Er. Lalrothanga chuan a tlawh.

E-in-C, PHED chuan Saitual District chhunga tui lakna hrang hrangte dinhmun chiang zawka zirna hmun tur atana sak mek, District Laboratory chu a hmunah tlawhin a enfiah a, kumin chhunga peih fel ngei a nih theih nan thawktute hma la turin a hrilh. Greater Saitual WSS (Pumping) Saitual khawpui chawmtu Tuivawl Lui Pump House ah kalin, Intake weir dinhmun te zirchian nghal a ni a. Furpui lo thleng leh tur hmachhawn tura inbuatsaih dan turte thlir ho niin, Christmas lo thleng tur mipui ten hlim taka hun an hman theih nan Er. Lalrothanga chuan theih tawp chhuah turin a thawktute a fuih nghal a. E-in-C chuan Saitual khawpuiin tui hnianghnar taka an lo neih theih nan a water supply scheme 24x7 ruahmanna siam te leh Treatment Plant sakna hmun tura ruahhmanna te a enfiah nghal bawk a ni.

He hunah hian Engineer-in-Chief, PHED, Er. Lalrothanga hi Er. H. Duhkima Chief Engineer Zone-II, Dr. ZR. Ṭhasangzuala EE (Planning) CE Zone-I leh Er. Thanchungnunga Superintending Engineer, Er. Liantluanga Chohte Executive Engineer leh Er. Eliza Vanlalpeka, SDO leh thawktu dang ten an ṭawiawm.