3567/2024-2025

2024 Sahmulphah thla ni 28: Vawiin khan NIELIT Lunglei leh Mizoram Police ṭang kawp huaihawtin SP Conference Hall, Lungleiah Southern Range huam chhunga police-te tan computer leh internet hmanga data pawimawh vawn ṭhat dan leh pawi khawihna beih let dan zirna, ‘One Day Awareness Training on Protection of Data and Digital Public Goods for Government Employees and Police Officer’ buatsaih a ni.

He hunah hian NIELIT Aizawla Principal Technical Officer Pu Lalrempuia Sailo chuan hun buatsaih chhan a sawi fiah a. Lunglei District Superintendent of Police Pu J. Lalmuankima chuan training hi hawngin, Mizoram Police leh NIELIT te ṭang kawpin SP Office, Lungleiah police-te tan Computer Training Centre ruahman a nih thu leh hawn theih ṭep a nih thu a sawi a. Computer Training Centre-a hman tur computer full set 22, computer dawhkan leh ṭhutthleng bakah, 72 inch monitor dah fel tawh a nih thu sawiin, Computer Training Centre-a zirtirtu atan Pu Lalrinmawia, B.E. (Computer Science & Engineering) chu lak fel a nih tawh thu a tar lang bawk.

He training-ah hian Southern Range huam chhunga police mi 27 an tel a. Tun lai information technology (IT) thiamna sang chho zela sualna pung chho zel do tura police-te tana hriat tur pawimawh hrang hrang zir ho a ni a. Pu Lalrempuia Sailo, Principal Technical Officer, NIELIT Aizawl leh Pu Lalrinmawia, Faculty, NIELIT Lunglei te’n internet kal tlanga dan bawhchhiatna leh pawi khawihna hrang hrang ven dan leh beih let dan te, mipui leh digital data venhimna leh hnu chhuina kalpui nana internet leh khawl hrang hrang hman dan te an zirtir a. Training-a tel zawng zawngte hi certificate hlan vek an ni.