3568/2024-2025

Champhai, 28th November 2024: Vawiin khan Adviser to CM Er. H. Ginzalala chuan Champhai khawpuia hmunhma hrang hrang - Skill Development & Enterpreneurship Incubation Centre, CHANEM; Vanlallawma Indoor Stadium (VANIS), Rahsi Veng Bazar, Industrial Training Institute (ITI),  Integrated Infrastructure Development Center (IIDC), Zote leh Passion Fruit Processing Unit, New Champhai te a tlawh. 

Champhai New Market (CHANEM) Building-a Skill Development & Enterpreneurship Incubation Centre a tlawhnaah hian Er. H. Ginzalala hi Indian School of Business, Hyderabad leh Inquisit Consultant, Bhubaneshwar aṭanga lo kal - Pu Suresh Krishna Bandi, Pu Animesh Patra leh Dr Tuna Rout ten an ṭawiawm a. Er. H. Ginzalala chuan Indian School of Business te nen ṭangkawpin, Champhai khawpuiah ‘Innovation Hub’ din ngei tumin hmalak mek a ni tih a sawi a. A hlawhtlin ngei theih nan Mizoram sawrkar pawhin theihtawp chhuah a inhuam tih sawiin, mipuite pawh he mi kawnga ngaihtuahna thar seng tur leh hlawhtlin duh tak tak na nena hma la turin a chah a ni.

Pu Suresh Krishna Bandi, Pu Animesh Patra leh Dr Tuna Rout te pawhin he hunah hian thu sawiin sawrkar hotute nen thawhho a, enterpreneur te khaichhuah chu an tum ber a ni, an ti a. Champhai mipuite chu ngaihtuahna ṭha leh tumruhna an neih phawt chuan sawrkar laipui, state sawrkar leh pawl hrang hrang ten puih an inhuam reng a ni tih hre turin an chah a. Hlawhtlinna chu zan khat thil thu a awm thei a ni lova, a tahtawla hmasawn zelna in a hringchhuak zawk ṭhin a ni tih hre reng turin an fuih bawk.

Er. H. Ginzalala hian New Champhai-a North Eastern Council sum hmanga din Passion Fruit Processing Unit a tlawh a. District Horticulture Office a thawktu ten he hunah hian Adviser to CM hi an lo dawngsawng a ni. Passion Fruit Processing Unit sakna leh khawl mamawh te bunna atan hian North Eastern Council chuan cheng vaibelchhe 6.5 a ruahman a. Tun dinhmunah building sak hna hi zawh fel thawkhat tawh niin, khawl mamawh ang te bun tura hmalak mek a ni. 

Er. H. Ginzalala hian Champhai Zote a Industrial Training Institute (ITI) leh Integrated Infrastructure Development Center (IIDC) te pawh a tlawh a. ITI hi raltlante dahkhawm nan hman mek a ni a, IIDC hi District Court in an luah mek a ni. Raltlante hi Champhai Sub Hqrs YMA ram, Zion Vengah sawn tum mek an ni a; District Court pawhin Champhai Vengsangah hmun thar an buatsaih mek bawk. District Court leh raltlan ten an chhuahsan huna IIDC leh ITI hmunhma te ṭangkai taka hman a nih theih dan tur a hmun ngeiah Champhai North bialtu MLA hian a enfiah a ni.