3569/2024-2025

Dated Serchhip, the 28^th November, 2024: Vawiin khan Serchhip DC Pisapui Hall-ah Serchhip District Election Office chuan Systematic Voters Education & Electoral Participation (SVEEP) hnuaiah ‘Inter-School Public Speaking Competition’ an buatsaih a. Serchhip Town Area chhunga High School & Higher Secondary School hrang hrang atangin Zirlai 12 ten ‘Electoral Roll a chuan leh Vote thlak pawimawhna’ tih thupui hmangin mipui hmaa thusawi (Public Speaking) an intihsiak a ni.

He hun hmanpuitu District Election Officer (DEO ) leh District Bawrhsap ni bawk Pu Paul L.Khuma chuan hawnna thu sawiin thupui neia mipui hmaa thusawi (Public Speaking) chu mite thinlung hneh nana thil pawimawh a nih thu te,chu chuan thil ropui tak a thlen tir theih thin thu te a sawi a. Mi ropui tak tak te pawhin mipui hmaa thusawi chu an harsatin an zam ve thin; chuvangin, intihsiaknaa tel naupang ten an huphurha an zam a nih pawhin mak ti lo tur leh, an puitlin zelna tur kawnga inbuatsaihna atana thil tangkai tak a ni tih hre turin a chah a. Participants zawng zawngte chu theihtawp chhuah turin duhsakna a hlan a ni.

He ‘Inter-School Public Speaking Competition’ah hian mithiam Endiktute kaihhruainain,Serchip khawpui huamchhunga H/S leh HSS zirlai 12 te chuan thupui thlanbik -‘Electoral Roll a chuan leh Vote thlak pawimawhna’ tih hnuaiah Sub Topic 3 : 1)I aiawhtu thlang turin Electoral Roll-ah chuang rawh; 2).Ram hruaitu tha thlan hi kan mawhphurhna a ni; 3). Ka vote, ka ram tan; tihte hmangin Miniute 4-5 chhung theuh mipui hmaa thusawi an intihsiak a, Lawmman Pakhatna (1st prize) -C.Lalpekhlua Govt PCR High School Serchhip niin(Certificate + ₹8000) Pahnihna (2nd Proze) Lalremhlua Eklavya Model Residential School Serchhip (Certificate +₹5000) leh Pathumna (3rd Prize)- Lalruattluanga Government Higher Secondary School,Serchhip (Certificate + ₹3000) ten dawngin,he initihsiaknaa a tel zawng zawngte hi ‘Partcipation Cerificate’ pek vek an ni bawk.