3570/2024-2025

Aizawl, the 28th November 2024: Vawiin khan Chanmari YMA Hall-ah MIGOSTA General Conference vawi 13-na neih a ni a. He hun hi Education Minister Dr Vanlalthlana chuan Khuallian niin a hmanpui.

He hun hmanpuitu Pu Dr. Vanlalthlana, Education Minister chuan Zirna hi ram hmasawnna bulpui a nihzia a hriat thu leh zirna in hrang hrang a tlawh chhuah hnem tawh thute a sawi a.

Zirtirtu insemrual loh lutuk vanga zirlai khawngaihthlak tak tak a hmuh hnem thute sawiin a ngaih pawimawhzia a sawi bawk a ni. Zirna siam tha turin sawrkarin theih tawp chhuahin hma a lak mek thu te sawi langin zirtirtute pawh tun lai khawvel changkanna mil zela in update zel turin a chah nghal a ni.

Zirlaite tan rilru leh ngaihtuahna seng nasa turin Zirtirtute a fuih bawk a. Upgradation chungchang leh hmalakna kal mek te sawifiahin, tunah hian thil tifel deuh thawkhat tawhin cabinet meetingah thlen a ni thuai dawn a ni tih a sawi.

Sawrkar school ni thei tura tih tur pawimawh hrang hrang te sawi langin, VSK app hmangin thil engkim enfiah theih reng a nih tawh thu te, nakinah phei chuan KAI app hmangin attendance te pawh la en vek tawh a ni dawn a ti a. Miretheite kan khawngaiha kan chawi kang duh a nih chuan Zirna kan ngai pawimawh tur a ni tih hi tun Sawrkarin in a ngaih pawimawh a ni a ti a. Zirtirtu kal khawmte chu mahni thawhna school theuhah tan la sauh sauh turin a fuih a ni.

Session thenkhatna, chawhma program MIGOSTA Vice President Pu David LC Chhakchhuakin a kaihruai a. General Secretary Pu Dr.K.New Israelan report a pe a. MIGOSTA school hi Mizoram khaw hrang hrangah 129 awm mekin thawktu mi 900 vel an awm mek a. Zirlai naupang 6000 vel an enkawl mek a ni.

Kumin chhungin member boral 13 leh member pension chhuak 6 an awm a, hengte hi a sunna hun hman a ni. He mi hnuah hian President Pu Lalzirlianan thu a sawi bAwk a.

Hemi hnu hian Information Secretary Pu PT Lalnunngaian lawmthu sawiin chawhma hun a khar a ni.

Chawhnu lamah Rorel leh hruaitu thar thlanna hun an hmang a. MJA lamte kaihhruaina hnuaiah hruaitu thar atan heng mite hi thlan an ni (2024-2026):

President: Pu Lalzirliana
Vice President: Pu David LC Chhakchhuak
General Secretary: Pu J.Lalvarliana
Secretary: Pu Dr.K.New Israela
Treasurer: Pu Lalhlimpuia
Finance Secretary: Pu B.Lalduhzuala
Information Secretary: Pu PT Lalnunngaia