3105/2022-2023

Champhai, the 19th December, 2022: Ruihhlo leh a kaihhnawih hrang hrang laka India ram a fihlim theihna tura sawrkar laipuia Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan Committee, Undivided Champhai District chu vawiin chawhma khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

Pu James Lalrinchhana chuan Nasha Mukh Bharat Abhiyan (NMBA) leh District Level Narco Coordination Centre (NCORD) Committee hmalaknate inngheng tlang reng anih thu leh kalkawp tlan tir thiam a pawimawh thu a sawi a. NMBA hnuaia hmalakna District 372 zinga hmalaknate ngaihhlutawm tak takte midangte hnena puangzar tur leh inrawnkhawmna hun National Level Panel Discussion-a tel tura thlan District 8 zinga Champhai District a tel chu chhuanawm a tih thu sawiin, he hunah hian Champhai District chhunga Nasha Mukh Bharat Abhiyan hmalaknate Sawrkar laipui hotute leh State dang aiawhte hnenah kimchang taka hrilhhriat a ni, a ti a. Kalkhawmte chu ruihhlo hman sual ven kawnga hmalakna tur kalphung thar leh hmasawnna thlen thei tur angte ngaihtuaha theihtawp chhuah turin a sawm a ni.

Member Secretary, Nasha Mukt Bharat Abhiyaan, Champhai District Pi PB Liansangpuii, Coordinator, Mizoram Social Defence & Rehabilitation Board, Social Welfare & Tribal Affairs Department hnen atangin Nasha Mukh Bharat Abhiyaan kaltlanga ruihhlo do kawnga hmalakna hrang hrangte ngaihthlak a ni a. Nasha Mukh Bharat Campaign kaltlanga 2022-2023 chhunga Champhai District-a hmalakna tur Annual Action Plan duante zirho a ni bawk.

Hmalaknate hrang hrang tarlan zingah June 2021 atanga December 2022 chhungin District Level Nasha Mukh Bharat Abhiyan Committee bultumin zirna in hrang hrang 76 ahte Peer Volunteer 50 te kaltlangin Drug Prevention Awareness Campaign neih niin, August ni 30, 2022 khan campaign zawh fel a ni a. Student's Club/ NMBA Club-te dinfel a ni a. Khawtlang huap Drug Prevention Awareness Campaign pawh kalpui niin, media campaign-te pawh neih thin a ni a. District Hospital Champhai nena tangkawpin ruihhlo ngaite tan Health Camp buatsaih niin, hemi kaltlanga inentir mi 155 an awm tling a. Heng bakah hian kumin chhungin International Day Against Drug Abuse & Illicit Trafficking puala hun hman a ni a; Drug Prevention Awareness Rally leh Zirlaite pual ruihhlo ti lo tura thutiam lakna hunte hman a ni.

NMBA kaltlang hian District Master Trainer te'n High School thlanchhuah hrang hrang 30 a Zirtirtute tan Drug Prevention Awareness Training an nei a. Govt. Champhai College nena tangkawpin Voluntary Blood Donation Camp buatsaih a ni a. SYMA, Shalom Society leh ITECH te nena tangkawpin Futsal Tournament buatsaih niin, he hunah hian Drug Awareness Campaign leh HIV Blood Test-te neih a ni bawk a. NMBA hnuaia hmalakna India ram District 372 atanga National Level Panel Discussion nei tura District 8 thlan zingah Champhai District thlan tel niin, Sawrkar laipui lama hotute leh District dang 7 hotute nen inrawnkhawmna hun hlawkthlak tak hmanho a ni bawk.

Nasha Mukh Bharat Abhiyaan-Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Kuminah District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District ni a a tarlan zulzuia thlante an ni.