3104/2022-2023

Mamit 19th December, 2022 : Vawiin khan DC Conference Hall, Mamit-ah Good Governance Week (19-25 December) hawnna leh Workshop on Good Governance neih a ni a. Pu Lalnunhlua, District Bawrhsap chuan a hmanpui.

District Bawrhsap chuan Sawrkar hnathawkte chu mipui tana thawk kan nih angin min dawrtute tana biak nuam, an harsatna chinfelpui tura engtik lai pawha biak theih leh dawr theih ni tura hnathawktu ni turin a chah a, kan office duty time piahlamah pawh a mamawhtute tana chhanna ni tura inbuatsaih tur te, langtlang Sawrkar siam zel tur leh kan mawhphurhna theuh hlen thar zel turin kalkhawmte a sawm a ni.

Vawiin Workshop-ah hian Pu Laldingliana, District Education Officer chuan Good Governance Practices on Education Sector tih hmangin an Department-in Good Governance an kalpuina kawnga hma an lak dan leh kalpui dan bakah zirna kawnga hma lakna hrang hrangte a lem nen chipchiar takin a tarlang a, Pu Zothankhuma Chhakchhuak, Chief Medical Officer chuan Good Governance Practices on Health Sector tih hmangin Health Department hnuaia Sawrkar hmalakna hrang hrang bakah anmahni dawrtu damlote enkawlna kawnga hma an lak dan hrang hrangte a tarlang bawk. Pu Vanlalhmachhuana, SDO(S) chuan Good Governance initiative in DC's Office tih hmangin mipui tana awlsam zawk leh Good Governance tha zawka kalpui a nih theih nana online hmanga Certificate, licenses hrang hrang dil theihte a lem nen chipchiar takin a tarlang bawk a ni.

He hun hi Pu HD Lalpekmawia, PD, DRDO chuan kaihruaiin inlawmna thu a sawi a, kalkhawmte atangin zawhna leh chhanna hun hman niin Pi Sapliannguri, Superintendent, DC Office chuan lawmthu sawina a nei bawk.

Vawiin Workshop-ah hian Mamit khawpui chhunga Sawrkar Department hrang hrang atangin Officials te an tel a ni.