3691/2022-2023

Champhai, the 27th February, 2023: Ruihhlo leh a kaihhnawih hrang hrang laka India ram a fihlim theihna tura Sawrkar laipui Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan (NMBA) Committee, Undivided Champhai District chu vawiin chawhnu dar 1 khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

Pu James Lalrinchhana chuan India ram puma drugs hluarna district 372 thlan chhuah zinga ruihhlo do beihpui thlak kawnga hmalakna tura thlan zingah Undivided Champhai District a tel thu sawiin, District Level Narco Coordination Centre (NCORD) Committee hmalaknate nena inngheng tlat anih thu leh kalkawp tlan tir thiam a pawimawh thu a sawi a. India rama ruihhlo nuaibo a nih theih nana hmalakna, Nasha Mukh Bharat kaltlanga ruihhlo donaah tha thlah a thiang loh thu sawiin, kalkhawmte chu ruihhlo hman sual ven kawnga hmalaknaah tha thlah lova tang zel tur leh vahchhuahna apiangah remchang laa midangte zirtirtu nih tum theuh turin a chah a ni.

Member Secretary, Nasha Mukt Bharat Abhiyaan, Champhai District Pi PB Liansangpuii, Coordinator, Mizoram Social Defence & Rehabilitation Board, Social Welfare & Tribal Affairs Department hnen atangin Nasha Mukh Bharat Abhiyaan kaltlanga ruihhlo do kawnga hmalakna hrang hrangte ngaihthlak a ni.

He hunah hian thutkhawm hmasa a thurel bawhzui a nih dante ngaihthlak a ni a. NMBA hnuaia sub-commitee siam that leh member-te tarlan a ni a. January 2023 zawh thlengin Undivided Champhai District chhunga school 136 ahte ruihhlo leh a kaihhnawih chungchang inzirtirna neih tawh niin, zirna in 5 dang hmabak la awmahte pawh a hma lama neih nise tih a ni a. Thla liamta chhunga hmalakna tarlan zingah vaihlo leh a kaihhnawih ven kawnga hma la tura din, Sale of Tobacco & Cigarettee Monitoring Team ten zirna in leh a chhehvelte enfiahin zirtirna an pe a. NMBA, NSS leh Anti Drugs Cell, Govt Champhai College-te tangkawpin zirlaite tan inzirtirna hun an buatsaih bawk a. Dinthar vengah Free Health Clinic buatsaih a ni bawk. Thutkhawm leh hmasak berah sawm bik neia hungzau zawka inrawnkhawmna neih tha tih a ni a. Ruihhlo ngaite chungchang zirchianna zau zawka neih tha tih ni bawkin, Study Group din nise an ti a; zirchianna atanga thil hmuhte anga ruihhlo do kawnga hmalakna zau zawk neih nise tih a ni bawk.

Nasha Mukh Bharat Abhiyaan - Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District ni a a tarlan zulzuia thlante an ni.