4001/2022-2023

Champhai, the 27th March, 2023: Ruihhlo leh a kaihhnawih hrang hrang laka India ram a fihlim theihna tura Sawrkar laipui Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan (NMBA) Committee, Undivided Champhai District chu vawiin chawhnu dar 3 khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

Pu James Lalrinchhana chuan ruihhlo do kawngah tha thlah a rem loh thu sawiin, hmalakna leh hmachhawpte sawi hova inrawntlan leh infinchhuah tam a pawimawh thu a sawi a. Nasha Mukh Bharat Abhiyaan kaltlanga India ram puma hmalakna District 372 thlan zinga hma la tha zual 10 thlan chhuah zinga Champhai District a tel chu lawmawm a tih thu sawiin, ram leh hnam hmelma lian tak ruihhlo leh a kaihhnawih do kawngah lungrual taka hmalak a tul a ni, a ti a. District Level Narco Coordination Centre (NCORD) Committee hmalaknate nena inngheng tlat a nih thu leh kalkawp tlan tir thiam a pawimawh thu a sawi bawk.

He hunah hian Line Department hrang hrang leh ruihhlo ngaite enkawlna Home hrang hrangte hnen atangin report ngaihthlak a ni a. Kum tlinglo ruihhlo khawih a hluar thu pawh tarlan niin, a bik taka enkawl an nih theih nana pawimawhte sawiho a ni a. Ruihhlo leh a nghawng thalote inzirtirna Drugs Awareness Campaign kaltlanga hmalaknate hlawk zawka kalpui a nih theih dan turte zau taka sawiho a ni a. Inchhungkhur atanga ruihhlo leh a kaihhnawih do bultan a tul takzet thu tarlan a ni a. February 2023 zawh thlengin Undivided Champhai District chhunga Sçhool 136 ahte ruihhlo leh a kaihhnawih chungchang inzirtirna neih tawh niin, zirna in 5 dang hmabak la awmahte School luh veleha hmalak nise tih a ni a. Ruihhlo ngaite enkawl kawnga awmze nei zawka hmalak a nih theih nana program duang tur Sub-Committee din a ni a; zirchianna atanga rawtna awmte Committee hnena thehlut tura tih a ni. April thla chhungin Champhaia ruihhlo ngaite enkawlna home 6 awmte tlawhchhuah nise an ti bawk.

Nasha Mukh Bharat Abhiyaan- Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.