4000/2022-2023

Aizawl, the 27th March 2023: Vawiin chawhma khan Governor Hari Babu Kambhampati chuan Raj Bhavan-ah Fisheries Department hotute a kawm a. He hunah hian Fisheries Department hnuaia hmalakna leh Mizorama Blue Economy kalpui dan te sawi ho a ni.

Meeting-ah hian Fisheries Department aiawhin Pu Laldawngliana, Secretary, Pu F. Vanlallawma, Director leh senior official te an rawn tel a. He hunah hian PowerPoint hmangin Fisheries Department hmalakna kal mek leh Blue Economy - lui luang, dil, tuikhuah leh a dangte fisheries kaihhnawih eizawnna atana siam tura hmalakna kal mek te thlirho a ni bawk.

Governor Hari Babu Kambhampati chuan State Budget atangin Fisheries Department in a thawktute hlawh tur deuh chiah an dawng chunga Fisheries Department hlawhtlinna te chu Fakawma a tih thu a sawi a. Sangha khawi hi eizawnna hlawk a nih zia te kuthnathawktu tam zawkin an la hmelhriat loh avangin tan la turin Fisheries Department hotute chu a fuih a ni. Sum leh pai indaihlohna avanga State atanga hnathawhna tur sum a awm loh pawhin Fish Farmer te hmalakna pui turin Bank lam dawr theih a nih thu a sawi a. Sangha khawi tena bul tanna atana an mamawh sum hlawm te, Bank loan anga lak theih dan kawng te dap sak tur leh hemi chungchang te Bank Officials te nena sawiho turin Fisheries hotute chu thurawn a pe bawk a ni.

Tunah hian Mizoramah Kum chanve chhunga Sangha eitur bak a la thar lo chu tan lak leh zual a ngai tih sawiin Mizoram mipui ei khawp tal chu tun atanga Kum 2, Kum 3-ah chuan tharchhuah a ngai a ni a ti.

Sangha ei tur tharchhuah kawngah Sangha chi hrisel atam thei ang bera siamchhuah chu a tul hmasa tih a sawi a. Hatchery neitute department mithiam ten an vil uluk a ngai tih a sawi a. Sawrkar enkawl demonstration fish farm-ah te pawh kuthnathawktu zirtirna kalpui a nih rualin Sangha chi tam tham zawk tharchhuah tum turin Fisheries hotute chu a chah a. Sangha tharchhuah a lo pun huna tangkai tur - vur siamna hmun neih belh, Sangha phurhna lirthei neih belh leh a zawrhna hmun tur lo zir lawk a(market survey) kawnga lo inhmakhaw suih lawk turin Fisheries Department hotute chu thurawn a pe bawk a ni.

Fisheries Department report in a tarlan dan chuan CSS - PMMSY, RKVY, Article 275(1) hnuaia hmalakna, SASCI leh SEDP hnuaiah Fishery Sector tih hmasawn nan hnathawh mek a ni.

Mizoramah Sangha khawi theihna hmun - potential area 24000 Hectares a zau a awm ni a chhut a ni a. Tunah hian potential area zau zawnga chhuta 22.10% ah chiah Sangha khawia hmalak a la ni. Tunah hian Mizoramah hian Sangha 13000 MT bawr kumkhat chhunga kan mamawh zat niin chhut a ni a. Kum 2022 khan kumkhat chhunga Sangha ei tur Kan mamawh zat atanga chhuta 40% aia tlem, 4575 MT vel thar chhuah a ni a. Kan Sangha ei thin zinga a tam zawk hi state pawn lam, abikin Andhra Pradesh atanga lakluh a ni.

Fisheries Department chhut dan chuan chhungkaw 16588 vel hi Sangha khawi leh a chi siamna kaihhnawih thila inhnamhnawih nia ngaih an ni a. Chungkaw 6283 te chu sangha man(Capture Fisheries) in ei an zawng a ni. Chhungkaw 11204 chu fisheries huanga eizawng nia chhut a ni a. Chhungkaw 30150 vel hian fishery sector atangin sum an lalut niin chhut a ni bawk a ni.

Sawrkar enkawl  Fisheries Demonstration Farm 5 a awm mek a. Heng zinga a thenkhat te hi Fisheries Department vilpuina hnuaiah mimal la enkawltir tumna a awm tih Fisheries Department hotute chuan an sawi a ni. Sangha chi siamchhuahna - Hatchery 9 a awm mek a, heng te hi mimal ta an ni vek a, Fisheries Department hnuaiah accreditation pek an ni.