3999/2022-2023

Champhai, the 27th March, 2023: Tunhnaia Chief Minister, Pu Zoramthanga'n Champhai a tlawh atanga hmalakna tur hrang hrang tarlante bawhzuina kalzelah vawiin khan Champhai bialtu MLA pahnih, Pu T.J. Lalnuntluanga, Law & Judicial Minister & MLA, Champhai South AC leh Dr. ZR Thiamsanga, Vice Chairman, Health & Family Welfare Board & MLA, Champhai North AC te chuan Champhai tana hmasawnna hnathawh turte tlawhin an enfiah.

Chief Minister hian Champhai a cham chhunga khawtlang hruaitute meeting a neih puinaah Champhai khawpui leh a chhehvela hmalak theihna tur hrang hrangte a sawi a. Hemi bawhzuia hmalakna theihna tur enfiah zingah Parking siam theih dan turte, Chhangphut Field-a zan lama inkhelh theihna tur Flood Light cheng vaibelchhe 1.5 senga siam theih dan turte, Zotlang leh Tlangsam inkar kawng Double Lane black-topping, cheng vaibelchhe 4 senga siam theih dan turte a tel a. Project estimate siam dan tur leh a tul dangte bawhzuiin Champhai bialtu MLA pahnihte hian Official-te hruaiin a hmunah hmalak dan tur an enho a ni.

Law & Judicial Minister Pu T.J. Lalnuntluanga chuan a bial chhung Ruantlang Lersia Field chhak lei tlahniam thin, DM&R Department kaltlanga siamthat dan turte, Mualvenga lei tlahniam awmna hmun dawl ?hat dan tur te leh, Sub-Hqrs. YMA Champhai Conference neihna hmun tur Ruantlang Vanhnuailiana Hall-a Pandal sak belh mekte a tlawh a. Kanghlai tlang (Mualnuam) panna kawng leh tlang hmunhmate PMJVK scheme kaltlanga cheithat a nih theih nana project lian tham deuh siam dan turte Official-te nen an enho nghal bawk.

Vawiin vek khan Champhai bialtu MLA pahnihte hian an bial chhunga Special Assistance to State for Capital Investment (SASCI) hnuaia hmasawnna hnathawh mekte an tlawh bawk a. Heng zingah hian Champhai Vengthar leh Zote kai inkar kawngpui black-topping thawh tan tur leh Vengthar Field laih zawh takte, Chhangphut Field chung kawngpui, motor parking atana laih zau mekte a tel a ni.

Law & Judicial Minister Pu T.J. Lalnuntluanga leh H&FW Board Vice Chairman Dr. ZR Thiamsanga te hi Champhai District Bawrhsap Pu James Lalrinchhana leh Pu Lalrinpuia Varte, SP Champhai te bakah PWD atangin Er. B. Vanlalhruaii EE, Er. Hmingthanmawia, SDO, Champhai North Division, Er. Jonathan K. Thangmawizuala, SDO, Champhai South Division, Official dang leh khawtlang hruaituten an tawiawm a ni.