3998/2022-2023

Dated Serchhip, the 27th March, 2023: Vawiin hian District Programme Office, Women & Child Development, Serchhip District, Child Development Project Office, Serchhip District leh Health Department tangkawpin CMO Conference Hall Serchhip ah Anaemia Camp an buatsaih a, he hun hi Millet (Buhtun) ei a that zia leh Anaemia venna tha tak anih thu inzirtirna hun atana hman a ni a; thupui atan ‘Test Treat Talk’ tih hman a ni.

Hun kaihruaitu Pu James Lalremliana, District Coordinator, Poshan Abhiyan, chuan inlawmna thu sawiin Ministry of Women & Child Development in ruahmanna a siam angina ni 20th March – 3rd April, 2023 chhung hian hapta hnih chhung awh Poshan Pakhwada an hman mek thu a sawi a. He hun hi Chaw tha ei a tul zia inzirtirna niin, a bik takin tleirawlten chaw tha an ei theih nana inzirtirna chi hrang hrang an kalpui mek thu a sawi a ni.

Pi Caryll Lalpari, CDPO Serchhip chuan thusawiin central sawrkarin hmeichhe tleirawlte a ngaipawimawh em em a, an veng theuha Anganwadi Centre ah chhinchhaih vek niin kum khat chhunga chaw tha an ei tur a thlawnin an dawng vek dawn a ni, a ti a, chu chuan thisen tlakchhamna (Anaemia) a veng dawn a ni, a ti bawk. Tleirawlte hi an hrisel chuan nakinah fa nei rual an nih hunah fa hrisel tak an la hring thei dawn a, chuvang chuan tun atangin an ei leh in te pawh uluk turin a chah a, chung zingah chuan Millets (Buhtun) hi chaw tha niin khawvel huap pawha a that zia inzirtir mek a ni a, taksa tana tha tinreng a pai a, ei tam kan inzirtir mek a ni, a ti bawk. Tui kan tih zawng chauh ei lovin kan taksa in a mamawh pai tur thil chi hrang hrang kan ei a tul a ni, a ti.

Resource Person Dr. Lalhruaikima, MO, RBSK Serchhip chuan Anaemia chu sawifiahin kan taksa in kan mamawh tawk thisen a pai loh chuan Anemia natna kan nei tihna a ni, a ti a, he natna hi khawvel puma mi hrang hrangin harsatna an tawh langsar tak a ni, a ti. A lo lanchhuah dan chu taksa a lo dawldang a, tin a lo dang thin a, taksa zawi te, chauh thutte, ngaihtuahna hmang ding thei lo tein an awm thin a ni, ti. A bik takin hmeichhe tleirawlte chu taksa inthlakthleng hunlai niin thisen mamawhna a sang a, thla tin hneichhe hunbi nei chhoh hun anih bawk avangin thisen tlakchhamna hi a thleng duh em em a ni, a ti a, ei leh inah fimkhur turin kalkhawmte a chah bawk.

Dr. Lallawmkimi, SMO Serchhip chuan thusawiin ei leh in kan fimkhur a tul a, kamram ei mai mai lovin mahni in ah a hunbi ah chaw pangngai ngei ei thin tur a ni, a ti a, chaw ei lova school kai mai loh tur a ni a, kan tui tih zawng chauh ni lovin kan taksa mamawh thlai hring te ei tam tur a ni, a ti bawk. Thisen tlakchhamna kan tawh loh nan sawrkarin kan tan ruahmanna a siamte tha taka zawm tur a ni, a ti bawk.

He hunah hian Anganwadi centre hrang hranga thawktute leh an centre huam chhunga tleirawl kum 14-18 inkar thlanchhuah te an kalkhawm a. Inzirtirna hun hman anih hnu hian tlerawl kalkhawmte chu HB test sak vek an ni a, a hniamte tana damdawi ei tur hi Anganwadi Centre kaltlangin pekchhuah an ni dawn a ni.