3997/2022-2023

Aizawl, the 27th March 2023 : Vawiin khan Deputy Chief Minister Pu Tawnluia, Chairman SEDP Executive Board ni bawk hovin SEDP Executive Board chu Aijal Club ah Family Oriented SEDP Phase 2 kalpui dan tur chungchang leh Phase I kalpui mek thlirin, hengte hi sawihoin an thukhawm.

Meeting kaihruaitu Deputy Chief Minister Pu Tawnluia chuan Family Oriented SEDP Phase 2 hi kalpui leh tur a nih thu sawiin beneficiaries 60000 dang thlan leh tura ruahmanna siam fel a nih tawh thu a sawi a. Phase 2 atan hian sum cheng vaibelchhe 300 dah a nih thu leh Phase 2 hi August ni 30 ral hmain tanpuina 2nd Instalment sum chu pek tlak vek tur a nih thu a sawi lang a. Phase I a beneficiaries tam zawk te pawhin tanpuina sum second instalment Rs. 25,000 theuh an account ah an dawng mek tiin a sawi a. Sum leh pai renchem a ngaih avangin Phase 2 a Administrative Cost tih hniam rawtna te chu thil tul tak ni a a ngaih thu a sawi bawk.

Meeting ah hian SEDP kalpuitu Implementing Department-te, District Level SEDP Committee-te leh Local/Village Level SEDP Committee-te tana SEDP Phase 2 a Administrative Cost tihniam rawtna chhawpchhuah te chu zau taka sawiho a nih hnuin pawm a ni a. Phase 2 kalpui dan tur duan chin Timeline te chu thlir hovin sawiho a ni leh a. Family Oriented SEDP Phase I a beneficiaries te endik hna ‘monitoring leh inspection’ chungchang pawh sawiho a ni bawk.

SEDP Executive Board meeting ah hian State Planning Board Vice Chairman Pu H. Rammawi bakah SEDP Board thenkhat Vice Chairman, MLA te – Pu Lalrintluanga Sailo, Pu C. Lalmuanpuia, Pu Ramthanmawia, Er. H. Lalzirliana, Pu Zothantluanga leh Prof. F. Lalnunmawia te an tel a. Planning & Programme Implementation Department hotulu-te leh SEDP kalpuitu Department Director-te an tel bawk a ni.

Family Oriented SEDP Phase 1 ah hian beneficiaries 60000 awmin benefiary tin te hnenah cheng 50,000 pek tur ruahman a ni a, 1st Instalment ah cheng 25,000 hi an dawng kim vek tawh a,  2nd Instalment cheng 25,000 pawh beneficiary tam zawk ten an dawng leh mek a. Hetiang bawkin Second Phase ah pawh beneficiaries 60000 dang thlan an ni leh dawn a, anni pawhin tanpuina sum 50,000 dawng tur ruahman chu Instalment hnihin an dawng dawn a ni.