1371/2023-2025
Champhai, the 3rd August, 2023: Ruihhlo leh a kaihhnawih hrang hrang laka India ram a fihlim theihna tura sawrkar laipui Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukt Bharat-Drug Free India Campaign' kalpuitu District Level Nasha Mukt Bharat Abhiyaan (NMBA) Committee, Champhai District chu vawiin chawhma khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

Meeting-ah hian Sawrkar Department-te bakah Champhai khawpui chhunga home hrang hrang enkawltute leh tlawmngai pawl aiawhte an tel a ni.

District Bawrhsap Pu James Lalrinchhana chuan Champhai District leh a chhunga cheng thalai tam tak run mektu, ruihhlo leh a kaihhnawih do kawnga hmalaknate inhrilhhriatna leh inhriatpawhtawnna hun a zing thei ang bera neih chuan ruihhlo do kawngah awmze thui tak a nei a ni, a ti a. Ruihhlo hluar zel karah a do tura Sawrkarin mawhphurna a pek te chu kan beidawn mai a thiang lo a ni tiin District Level NMBA Chairman chuan member-te chu theihtawp chhuah chhunzawm zel turin a sawm a ni.

Member Secretary, Nasha Mukt Bharat Abhiyaan (NMBA), Champhai District Pi P.B. Liansangpuii, Coordinator, Mizoram Social Defence & Rehabilitation Board (MSD&RB), Social Welfare & Tribal Affairs Department hnen atangin report ngaihthlak a ni a. Meeting hmasa dated June ni 6, 2023 neih hnu ah NMBA hmalaknain ngawlvei te enkawlna home (rehabilitation centre) paruk – Reformation Centre (Metakhen), Jail Veng; Synod Rescue Centre, New Champhai; MAzuia Memorial Home (TNT), Vengthlang Champhai; Emmanuel Rescue Home, Zion Veng; Grace Receivers Home, Zote leh Gosen Home Zote te tlawh chhuah a ni a. Heng Home-ah te hian enkawlna kalpui dan te leh thawktu dinhmun t e enfiah niin Doctor leh Nurse indaihlohna a nasa hle tih report a ni a.

Pu Vanlalvura Ralte, Asst Commissioner, Excise & Narcotics Department pawhin an hmalakna report a pe a. June ni 6, 2023 atanga vawiin August ni3, 2023 thleng khan E&ND ten Champhai District ah case 24 register tawhin min 32 an man a, heroin kg khat leh gram 100; Methamphetamine kg 18 leh gram 266 an man bawk a ni. June ni 26, 2023 khan Champhai to Aizawl Maxi Cab Owners’ Association te nen Anti-Drug Awareness Campaign an kalpui bawk a ni.

Police Department pawhin hemi kawnga an hmalakna report pe in, kumin June leh July thla chhung khan Champhai District huamchhunga High School leh Higher Secondary School pasarih (7) ah te Anti-Drug Awareness Campaign an nei a. Thekte khua ah raltlante hnenah Awareness Campaign hi neih a ni bawk a. District hmun langsar lai hmun 10 ah Anti-Drug Awareness Poster an tar chhuak bawk a. International Day Against Drugs Abuse and Illicit Trafficking 2023 pualin Law & Judicial Minister Pu T.J. Lalnuntluanga chuan June ni 26, 2023 khan Champhai District Police te'n October 2022 atanga February 202 thla thlenga ruihhlo an man, tualchhung rate a cheng vaibelchhe 3.78 hu a halral bawk a ni.

He hunah hian ruihhlo do kawnga inzirtirna zau zawk kalpui dan turte, thalai leh khawtlang nuna ruihhloin bu a khuar thuk tawh dante sawiho a ni a. Home-a thawktute intuaitharna atan training buatsaih tun pawh August ni 15, 2023 hma in neih hman ngei ni se tih rel a ni.

Nasha Mukt Bharat Abhiyaan- Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.