Vawiin khan Champhai District Level Standing Committee chu an Chairman District bawrhsap Dr Naveen Aggarwal hovin DC Conference Hall, Keifangtlangah an thukhawm. He hunah hian Polling Station  thar siam, Polling Station hmunhma thlak leh Photo E/Rolls 2nd Special Summary Revision chungchangte ngaihtuahho a ni.

Champhai District chhunga khaw pahnih Chawngtlai leh Zokhawthara Polling Station awmsaah voters 1200 chuang a awm tak avangin heng khuaah te hian Polling Station pakhat ve ve siam belh leh tura ruahman a ni a. 22-Tuichang (ST) A/C hnuaia 22/13 Chawngtlai Polling Station-ah voters 1204 awmin, ruahman dan chuan Polling Station pakhat dang siam belh leh a ni ang a,  Chawngtlai Polling Station-I ah voters 659 awmin, Chawngtlai Polling Sattion-II ah Voters 545 an awm dawn a ni. Polling Station atan Govt Chawngtlai M/S niin Pu David Zohmangaiha, Teacher, Govt. Chawngtlai H/S  chu Booth Level Officer (BLO) atana ruat a ni. 24- Champhai South A/C hnuaia 24/22-Zokhawthar Polling Station chuan voters 1268 a neih avangin Polling Station thar siam belh a ni bawk a, Polling Station thar 24/23- Zokhawthar-II (Zokhawthar East) hian Voters 557 neiin, Zokhawthar Secondary School (RMSA) chu Polling Station atana hmangin Pu Rosangpuia Tlaisun, Teacher Govt. Zokhawthar P/S-I chu BLO atana ruat a ni. 24/23-Zokhawthar Polling Station- I ah hian Voters 711 an awm dawn a ni.

Vawiin vek hian Champhai District chhunga Polling Station 6-te chhan hrang hrang vang leh remchan zawkna avanga hmunhma thlak a ni a. 21-Lengteng (ST) A/C hnuaia Polling Station 2 hmunhma thlak niin, Polling Station tharte chu Govt. M/S-I, 21/7 NE Khawdungse-II leh CRC Building Govt. M/S-I, 21/17 Hliappui-II ami te an ni a. 22-Tuichang Constituency hnuaiah Polling Station 2 thlak niin, 22/10-Khawzawl VIII (Electric Veng) atan Electric Veng YMA Hall leh 24/25- Sialhawk-II huam chhung  tan Chhinlung M/S, Sialhawk te chu Polling Station thar tura ruat a ni a. 25-East Tuipui (ST) A/C hnuaia  25/15-Vaphai-I huam chhung atan Govt. Fiaratui M/S leh 25/16-Vaphai-II tan Govt. Border M/S, Vaphai te chu Polling Station atana ruat a ni. Khawzawl Vengthar huamchhunga Polling Station, Ngur Polling Station leh Kawlkulh  South huamchhunga Polling Station chungchangte pawh sawiho niin, AERO hova enfiah nise ti a rel a ni bawk.

Heng bakah han 2nd Special Summary Revision 2018 kalpui mek chungchangte sawiho a ni a. Draft Roll hi July Ni 31, 2018 hian chhuah hman tum a ni a, August Ni 21, 2018 thlengin siamthat ngai leh Roll chungchanga thu thlen duhte tan hun hawn a ni ang a. Hearing te neih anih hnuah siam that ngaite September Ni 20, 2018 ah chuan siam zawh hman tum niin,   Electoral Roll thar ber  hi kumin September Ni 27 hian tihchhuah hman tum a ni.

Vawiin meeting-ah hian Political Party hrang hrang aiawh, NGO hotute, Media mite, ERO, AERO leh member dangte an tel a ni.