Vawiin khan Health, PWD etc. Minister leh MFA President ni bawk Pu Lal Thanzara chuan Kolasib Sports Stadium ah kolasib A/C MLA cup inter village council football tournament a hawng. 

Hawnna inkhawmah hian Khuallian chuan Kolasib District Football Association in khua leh vengte football inelna changtlung tak, MLA Cup an buatsaih thei chu lawmawm a tih thu a sawi a, phur taka thalai inkhelh theihna tur khelmual tha Sawrkarin a siam a, Sawrkar chuan a intiamna te a ti hlawhtling chho zel ani a ti. Thalaite leh Ram tana tha turah chuan, sum harsa deuh mahse Sawrkar in tih puitlin zel a tum a ni tiin District hrang hrangah khelmual tha siamin Sawrkar chuan Artificial Grass a phah mek zel a, hetiang inkhel, Inter Village Football hi Talent hai chhuahna tha tak niin tun tum MLA Cup atang pawh hian player tha tak tak eizawnna a tana hmang tur khawpa thiamna nei an lan chhuah ngei a rin thu a sawi bawk a ni. 

MFA President chuan MFA in a ngaih pawimawh em em chu, Intihhlimna leh hriselna atana inkhelh piah lamah, eizawnna tura inkhelh thiam hi a ni tiin tunlai thalaite ruihhlo in a tihbuai mekte pawh infiamna hmun tha kan neih atang te hian an chin thalo chu sim se nunkawng hrisel an zawh theihnan a duhsak thu a sawi ani. July ni 29 hian a vawi khatna turin football hmasawnna tura ram pum huap inrawnkhawmna, Mizoram football symposium buatsaih ani dawn a, District chauh ni loin , Zone Football Association hruaitute sawm an ni a, Mizoramah Football in hma a sawn zel a, a aia chak zawka ke pen zel an tum ani tiin MFA President chuan Kolasib Mipuite leh Kolasib District Football Association te chu thawhpuiah a sawm bawk a ni. 

Kolasib Bialtu MLA, he huna khual-zahawm ni bawk Pu PC Zoram Sangliana pawhin thu sawiin hun rei tak a ta tawh thalaite rualawhna 'khelmual tha' peka an awm chu lawmawm a tih thu a tarlang a, Mizoram Sawrkar chungah lawmthu a sawi a ni. Pu Lal Thanhawla kaihhruai Sawrkar chuan thalaite tan kawng hrang hrangin hma a la ani tiin hriselna kawngah Daktawr leh Nurse te, Damdawi ina dah tur khawl chi hrang hrang pek an nih bakah bakah zirna kawngah CZ Higher Secondary School Provincialise a lo ni ta te chu lawmawm a tih thu a sawi bawk a. Tun hma a infiammi chhuanawm tak tak thawh thin Kolasib District chuan infiamna hmun hma thatak an neih belh zel a, tun hma aia tam zawk infiammi chhuanawm tak tak an thawh chhuah a beisei thu sawiin tan an lak tur thu a sawi bawk a ni. 

Hawnna inkhawm nei zawhah hian MLA Team leh KDFA Team ten Exhibition Match an khel a, kolasib A/C MLA cup inter village council football tournament ah hian Mipa VC Team 14 leh Hmeichhe VC Team 9 ten Savun Hampuar hmangin inelna an hmachhawn dawn a ni. 

Attachment

  • Loading attachment...